Phah tohkit ka Sorkar ha u CE ban pynshisha ïa ka jingshna torti ïa ka surok Amlarem
Shillong, Naiwieng, 14: U Symbud Myntri Rangbah ka Jylla uba peit ïa ka tnat PWD u Bah Prestone Tynsong u la bthah ïa u Chief Engineer jong ka National Highways ban pynshisha halor ka jingkynnoh ba ka surok Dawki-Amlarem-Jowai ka la sator tang hapoh ar bnai baladep shna thymmai.
“Nga la bthah ïa u CE ka National Highways (ban wad bniah) la ki jingkynnoh ki long neem kiba dei ne ki bym dei bad ngin sa peit ïa kum kine ki jingtrei torti ïa ki projek la ka long ïa ki surok ne kino kino ki projek ha ka jylla Meghalaya ba kim dei ban jia kumne,” la ong u Bah Tynsong ha ka jingïakren bad ki lad pathai khubor.
U la ong ha ka jingshisha kane ka bynta jong ka surok ka dei kaba la peit da ka RO Station na Guwahati jong ka National Highway Authority of India (NHAI).
Ha ka 4 tarik mynta u bnai k aJoint Action Committee (JAC) kaba kynthup ïa ki Waheh Shnong ka War Jaiñtia Hills bad ka Hynniewtrep Youth Council (HYC) ki la byrngem ban mudui da ka PIL ha Ingbishar Meghalaya High Court halor ka jingkynnoh ba ka don ka jyrsieh bamsap ha kaba shna ïa ka surok Dawki-Amlarem-Jowai (NH 40E) (mynta kaba la tip thymmai kum ka NH-206) kaba la mang pisa da ka Sorkar Pdeng haduh T. 43 klur.
Ka JAC ka la dawa ïa ka Sorkar Jylla ban ai dak iong “blacklist” ïa ka Dhar Construction Company halor jingjot jong ka surok kaba dang shu dep shna thymmai tang hapoh ar bnai.
Ïa kane ka surok la mang pisa da ka Ministry of Roads Transport and Highways ha ka dor T. 43 klur. Ïa ka jingtrei la pynkhamti ha ka Dhar Construction Company ha ka 9 tarik, Nailur, 2022 bad la buh thong ban shna pyndep ïa ka surok hapoh 12 bnai.
Haba kylli, u Bah Tynsong u la ong, “lada dei ban ai dak iong ne ban ym ai ka shong ha ka jingïaid jong ka kam. Shisien
ba ka kam ka la ïaid shakhmat ngan sa lah ban tip bniah shaphang ka kaiphod bad ngan sa ïoh lut ïa ki jingtip kiba bniah namarba kane ka kam ka dei jong ka NHAI namarba kane ka dei ka surok National Highway bad kam hap hapoh ka jingpeit jong ka Sorkar Jylla namarkata ka NHAI ka dei kaba peit nadong shadong halor kane ka projek.”
Halor ka jingbthah jong ka Ingbishar ïa ka Sorkar ban aiti ïa ka kaiphod halor ka jinglong jingman jong ka surokbah National Highway-6, u Symbud Myntri Rangbah u la ong ba ka jingmaramot ïa kane ka surok ka la sd.ng
“Naduh Khliehriat ka jingtrei ka la sdang bad ka NHAI ka ladep aiti ha u kontraktor ban phah maramot bad mynta ka kam ka la sdang bad nga kyrmen ba shen yn sa lah ban shna pyndep,” u la bynra.