Kynnoh ki trai jaka ba buh Sawmill ba ïakynduh sopsop ki sengbhalang ïa ki bar jylla

Shillong, Naiwieng, 14: Ki trai karkhana ot dieng Sawmill hapoh Hima Jirang, Ri Bhoi District ki la pynpaw ka jingpyrshah halor ka jingkhot jong ki kynhun Sengbhalang hapoh Hima Jirang ban ïakynduh ïa ki bar jylla ha Jirang ha ka sngi saitjaiñ khlem ka jingtip jong ki trai jaka.
U Bah S. Mawiong uwei na ki trai jaka uba buh kor otdieng ha Paham Jirang ula ong, ba kane ka jingleh jong ki kynhun sengbhalang ha Jirang ka dei ka jingñiew beiñ ïa ki trai shnong ban khot ïakren ïa ki bar jylla kiba long tang ki nongpynïaid ïa ki kor otdieng ha Jirang.
“Ha ka jingshisha kum ki kynhun sengbhalang kiba trei ïa ka bha ka miat ki dei ban ïakren shwa bad ki trai kiba dei ki Khasi hynrei kaba lyngngoh ha ka sngi Saitjaiñ (jong ka taïew baladep) ki la khot pynban ïa ki bar jylla,” u la ong.
U la pynpaw kane ka long kumba ailad shuh shuh ïa ki bar jylla ban trei katba ki mon ïa ki kam khaïi pateng hapoh ka Hima Jirang. Namarba ym dei tang ki kor ot dieng hynrei bun ki bar jylla kiba trei ïa kiwei kiwei ki jait kam hapoh ka Hima Jirang.
“Mynshwa ki kynhun sengbhalang ki pyrshah jur ïa ki bar jylla ban trei ne pynïaid ïa ki kor otdieng bad ki kwah ïa ki trai shnong ban pynïaid hi hynrei mynta ki la kylla jutang bad khot ïakren tang bad ki bar jylla ban ïakynduh ban pynbeit bad ym lah ban tip kaei kaba don ha lyndet jong ka jingïakynduh sopsop jong ki,” la kynthoh u Bah Mawiong.
U la pyrshah jur ïa kane ka jingleh ki sengbhalang hapoh ka Hima Jirang ba kim ithuh ïa ki trai shnong ba pynïaid ïa ki Sawmill. “Kaba nga sngewsih palat ïa ka shithi ba la phah da ki sengbhalang halor ka jingïalang la wan ai da u bar jylla ïa nga u trai jaka bad nga la kyntait ïa ka jingpyntip namarba katkum ka rukom ki dei ban ai ïa nga u trai jaka,” u la ong.
La ïathuh hapoh Jirang ki don kumba 20 tylli ki kor ot dieng hynrei ki trai kiba dei ki Khasi kim shym la poi sha ka jingïalang ha ka sngi saitjaiñ bad ym lah ban tip kaei ka jingthmu ba don shalyndet ban ïakynduh ïa ki bar jylla na ka jylla Assam hynrei la suba ka lah ban dei halor ka jingïarap pisa namarba manla ka por ki ju dawa pisa na ki Sawmill.
Lah ban pynpaw ba bun ki kor ot dieng ha Jirang ki dei kiba pynïaid da ki bar jylla katba ki Khasi ki dei kiba shah kyrteng ha ki kam khaïi bad ki kam baroh la pynïaid hi da ki bar jylla bad kane ka lah ban dei kaba pynlong ïa ki sengbhalang ban kynduh ïa ki bar jylla ha katei ka sngi.