44 klur pan ka Sorkar Jylla na ka Sorkar Pdeng ban pynkhlaiñ ïa ka tnad Pynlip Ding

Shillong, Naiwieng 14 : U Symbud Myntri Rangbah ka jylla Bah Prestone Tynsong ula pyntip ba dang shen ula leit ïa kynduh ïa u Taj Hassan, Director General ka Tnad Fire Services, Civil Defense & Home Guards jong ka Ministry of Home Affairs ban kyrpad na ka bynta ban kyrshan lem ïa ka jylla Meghalaya ha kaban pynbha, pynkhlaiñ bad ban pynjanai ïa ka tnad pynlip ding (Fire Services and Emergency) ha ka jylla baroh kawei.
U Bah Prestone Tynsong ula ong ba ka sorkar jylla kala aiti ïa ka jingtyrwa ha u Taj Hassan khamtam hadien ba ka jylla ka la sakhi ïa ka jingpluh hapoh Police Bazaar bad ka sorkar ka kwah ban pynkhlaiñ bad ban pyndonkam da ki tiar ki tar katkum ka juk kaba mynta.
“Ngi la pynsngew ïa ka jingdonkam ka jylla Meghalaya ban pynbha, pynkhlaiñ bad ban pynjanai ïa ka Fire Services ha ka jylla baroh kawei da kaba pyndonkam da ki tiar ki tar kat kum ka juk kaba mynta ka ban kot T.44 Klur bad na ka liang u Director General yn sa pynïaid shakhmat ïa katei ka jingtyrwa” ong u Bah Prestone.
Ula ong, ba ka sorkar ka don ruh ïa ka jingthmu ban pyndonkam noh da ki kali pynlip ding kiba kham rit bad ban don ruh ïa ki pipe um kiba jrong ban ïoh pyndonkam ha ki jaka kaba ka kali kam lait ban ïaid.
U Bah Prestone Tynsong ula ïathuh ba ha ka jingleit Delhi ka jong u, ula leit ban ïakynduh ia u Secretary ka Ministry of DONER u Chanchal Kumar, ha kaba ïadei bad ki scheme bad ki project kiba la pyntreikam ha ka jylla Meghalaya.
“Ki don ki project kiba ngi lah dep kum ka Science and Commerce College ha Mawphlang hynrei ki Kontraktor ki la hap sangeh ka jingtreikam namar ka jingbym ïoh ïa ka pisa, kumta ngi la pynsngew ïa katei ka mat bad kiwei kiwei ki projek shna surok kaba ka jylla kam pat shim la ïoh satia ïa ka pisa ha ka wat ka baar ne balai bad na ka liang u Secretary ula mynjur ban pyllait noh ïa katei ka pisa kat kaba dei sha ka jylla Meghalaya” ong u Bah Prestone.