Nongpoh, Nailur 30: Kum ka jingai mynsiem ïaki samla pule ban nym ap tang haki kam sorkar, hynrei ban wad ki lad ki lynti ban sengkam sengjam lajong bad ban ieng hala ki jong ki kjat ka Entrepreneurship Development Centre jong ka Ri-Bhoi College mynta ka sngi kala sdang ïaka prokram ai jinghikai ba 5 sngi lynter kaba la tip kum ka Entrepreneurship Development Programme bala bei pisa da ka NEC jong ka sorkar India.
Ïa kane ka prokram la pynlong ha Conference Hall jong ka Ri-Bhoi College bad u bah Erick K Dkhar BDO ka Umling C&RD Block u la shim bynta kum u kongsan haka jingdonlang u EC Benny Principal ka Ri-Bhoi College, ki nonghikai lem bad ki samla pule.
Haba kren ha katei ka sngi naka liang u Bah E Dkhar kum u kongsan u la pynpaw ba kum kitei ki jait prokram ki long kiba kongsan hakane ka juk kyrduh kam kyrduh jam ba mynta, ba ki khun samla kim dei ban shu ap tang ki kam sorkar namar ka long kaba eh ba ki khynnah baroh kin ioh kam sorkar lada kim lah ban wan shakhmat haki jingpule, hynrei lyngba ka sengkam sengjam lajong kan plielad pat ïaki samla ba kim dei ban ud tang haka kyrduh kam hynrei ban mih shakhmat lyngba ka buit bad ka sap kaba ki don ban seng kam bad ban ieng hala ki jong ki kjat.
