Ha Shillong yn kiew ka KSU jong ki lai tylli ki Circle ryngkat ki paidbah nongshong shnong

Mawkyrwat, ‘Nailur 30: Ki lai tylli ki shnat treikam jong ka Khasi Students Union (KSU) ba kynthup ïa ka KSU Lawbah Border Area Circle, ka SU Balat Border Area Circle bad ka KSU Sawsymper Circle ryngkat ki paidbah kin sa kiew sha Shillong ban pynbor ïa ka sorkar ban kyntiew kyrdan noh ïa ka Mawsynram C&RD Block sha ka Mawsynram Civil Sub Division.
Ha ka kyrwoh khubor ba la phah da u bah Bonsen Snaitang uba dei u President jong ka KSU Balat Border Area Circle u la ong ba ïa mynta ki la rai ban pynlong biang ïa ka jingshongkyllaiñ mungor ne ka Sit-In-Demonstration ha ka 4 tarik u bnai Risaw, 2024 naduh ka por 10 baje mynstep ha madan Malki, East Khasi Hills District, Shillong.
Namarkata, ki kyrpad ïa ki nongshong shnong bad baroh ki nongïalam shnong, ki sordar shnong, Myntri shnong, nongïalam hima, ki Seng Longkmie, Seng Samla, Sengbhalang bapher bapher bad kumjuh ruh ki political party kiba don hapoh Mawsynram C&RD Block baroh kawei ba kin wan ïa shimbynta lang bad ki ha katei ka sngi khnang ba ka jingangnud jong ki paidbah jong ka dong ka thaiñ Mawsynram kan urlong noh.