Pynshai paidbah u bah DL Rymbai halor ka synshar khadar kaba khuid ba suba

Khliehriat Risaw 9: U bah Damewanhi.L.Rymbai uba na ka shnong Wapung, East Jaiñtia Hills District, u dei uwei na ki kyrtong na ka 6-Khliehriat Constituency, u ban ïa ai reng ha ka Assembly Election ka ban wan ha u snem 2023, ka jingangnud jong u ka long ban wanrah ïa ka jingkylla dur bad ka synshar khadar kaba khuid ba suba, kumta ka jingïalap bad jingpynshai paidbah ka la ïaid shaid shaid ha ki shnong bapher bapher kiba don hapoh ka 6-Khliehriat Constituency ban pynsngewthuh ïa ki paidbah ïa ka jingdonkam ban don ka khuid ka suba ha ka synshar khadar kaba ju ong ruh ‘A Clean Politic’.
Kum uwei na ki kyrtong u ban ïa ai reng u ïeng skhem halor ki nongrim kiba skem bad kiba don jingmut, ki ban kyntiew shisha ïa ka im lang ka sahlang, u long u riew rangbah uba ïohi jngai, u la ïohi ba ka la don ka jinghiar ha ka ïoh ka kot, ka jinghiar ka khaïi ka pateng kaba la ktah haduh katta katta ïa ki paidbah ka thaiñ, ka jingïakynduh jingeh ki paidbah ha kaba ïadei bad ka jingioh bor ding electrict, ka jingbym ioh ïa ka um bam um dih kaba biang, ka jingdkhoh ka rukom treikam ha ki shlem ai jingsumar ïa kiba pang ba shitom, ka jing sniew ki lynti ki syngkien kaba la long kumba la shu shah iehnoh khunswet shisha ïa ka East Jaiñtia Hills District.
U la bynrap shuh shuh ïa ki nongrim bad ki mat treikam jong u namar u la ïohi ruh ba ki don shibun bah ki jingduna ha ki shlem ai jingnang jingstad kaba naduh ki kyrdan Lower Primary School ter ter, ka jingbym ïaid beit ki lad ai jingïarap sha kiba deihok ban ïoh, ka jingbym ïohkam ïohjam ki khun samla ka district, ka jingngop ba shyrkhei ki khun samla ha ki jait jingdih pynbuaid ba bun jait kaba la i donkam shisha ban don noh ka jaka ban sumar ban kyrshan ïa ka jingim ki lanot, ka Rehabilitation Centre, ki jingeh ba bun ba ki nonghikai ki ïakynduh, ki jingeh ki ASHA, Aganwadi, ki Mid Day Meal, Muster Roll, ki jingeh ki nongbylla, ki nong ñiah kali hapoh ka district.
Utei u rangbah u don ruh ka jingthrang ban pynlong ïa ka shnong Wapung kaba long kum ka Head Quarter jong ka C&RD Block bad Khliehriat kum ka Head Quarter jong ka District kum ki Model Town hapoh ka district, ban kyntiew ïa ka rep ka riang bad ka kam ri jing ri ha ka 6- Khliehriat Constituency, u don ka jingangnud ruh ban ïasaid na ka bynta ka kam dewïong namar mynta la bun snem khlem shah shuh ban tih bad shalan ïa u dewïong, ban thaw ki lad ki lynti ban pynkhie im biang ïa ki sawdong sawkun, ban kyntiew ïa ka kam jngohkai pyrthei kiba hap hapoh ka Khliehriat Constituency, ban pynioh ïa ki hok jong ki paidbah khlem kano kano ka jingleh shiliang khmat, ban pynduh pyndam ïa ka jingbam sap kaba bam kruiñ ïa ka roi ka kiew ha baroh ki liang,, ban pynneh pynsah ïa ki riti ki dustur jong ki longshwa man shwa, ban wanrah ïa ka khuid ka suba ha ki shnong ki thaw, ki ïew ki hat kiba don hapoh ka constituency, ban wanrah ïa ki Centre bapher bapher ban ai jinghikai (Training Centre), ki Coaching Centre, ban kyntiew ïa ki sap ki phong lyngba ki Skill Development Centre bad kiwei kiwei ki lad jingiarap kiba katkum ka jingdawa ka por.
Ha man la ki rynsan ba u ïeng, u bah Damewanhi Rymbai u pynsngew ba u don shisha kata ka mynsiem ban ai ïa ka jingshakri kaba hok ka ban wanrah ïa ka jingkylla bad ka jingsynshar kaba ïajan bha bad ki paidbah nongshongshnong jong ka 6-Khliehriat Constituency, kaba ïajan ruh bad ki bor synshar district bad ruh bad ka jylla hi baroh kawei