Pynshai ka Kong Mary Santa Shylla ba phet ki nongïalam bad ki dkhot na ka NPP

Khliehriat rymphang 7: Ka kong Santa Mary Shylla, kaba dei ka kyrtong jong ka National Peoples Party na ka 5-Sutnga Saipung Constituency, lem bad ki nongïalam jong ka party, ha ka jingïalang ba la pynlong mynta ka sngi ha shnong Byndihati, ki pynshai halor halor ka jingmih noh ki nongkitkam bad ki dkhot jong ka party bad ong ruh ba ka jingmih jong ki kam don jingktah eiei ïa ka party.
Na ka liang jong katei ka kyrtong, ka la ïathuh ruh ba mynta ki la dep ban jied bujli da kiwei pat ki nongkitkam bad ki dkhot, ka pynshai ruh ba ha ka jingshisha na ka liang jong ka ha shwa ban jied ïa ka kum ka kyrtong, ka la dep ban ïasyllokki shwa bad ki bad ka la khot lang ruh ïa ki sha ka jingïalang, tangba ki khlem wan satia sha ka jingïalang bad ong ruh ba ka jingleh jong ki ka long pynban ka jingkyrkhu ïa ka party, namar kito kiba la mih hynnin ka sngi, ki dei ki bym don ka jingïatreilang naduh kaba sdang, kim don jingmut hi ban kyrshan ïa ka, namar ki la don hi la ka jingmut ban kyrshan noh ïa kawei pat ka party “ha ka jingïaid lynti jong ngi, ngin nang pynkhlaiñ shuh shuh ïa ka party bad kat nang mih ki sngi nga ïohi ba ki nang bun ki nongkyrshan, ngam duh jingkyrmen eiei na ka jingmih noh kito ki dkhot bad ngam sngew eiei ruh namar naduh ba sdnag kim shym la ïa don bynta lang bad ngi kum ka party”
Kumjuh ruh u President NPP-East Jaiñtia Hills District, u bah Seiborlang Shadap, uba dei u MDC u la ong “ Hadien ka jingmih khubor ba iehnoh kam ki dkhot jong ka party napoh ka district, nga la shimti noh kum u President jong ka NPP East Jaiñtia Hills District bad nangne shakhmat ngan trei bha na ka bynta ka party bad khmih lynti ba ka party kan nang kiew na ka por sha ka por”
U President NPYF East Jaiñtia Hills District, u bah Emlangki Lamare, u pynpaw ba ka jingmih noh jong kito ki dkhot na ka party ka dei tang ka jingsngew shimet jong ki hi, ym dei na ka daw ka kyrtong bad ym dei ruh na ka daw ka party, ka jingmih jong ki kam don jingktah eiei ïa ka party bad kam ktah eiei ruh ïa ka kyrtong.
U Working President jong ka NPYF East Jaiñtia Hills District, u bah Defender pakem u la ong “Ka jing iehnoh kam jong ki, ka nang ai bor shuh shuh pynban ïa ngi bad ngi la ïoh da kiwei pat ki nongkitkam kiba thymmai bad kam don kano kano ka jingktah ïa ka party namar kim shym la ïa don bynta lang shuh bad ngi naduh ki por ba la leit, ki long pynban kum ki nongpyn-thut, kiba pynartatien ha ka jingïaid lynti jong ngi, mynta ba ki la mih ngi la ïoh ka lad ban ïaid da ka lynti kaba khuid kaba shida khnang ba ngi kum ki nongtrei kam, ngin long pynban kiba iatylli bad kan long ka jingioh bor , ki paidbah kim dei ban duh jingkyrmen, ka jingmih jong ki ka long ka jingkyrkhu ïa ngi ba ngin ïa trei da kajuh ka buit, kajuh ka bor ban pynkhlaiñ shuh shuh ïa ka party bad ban pynjop ïa kane ka kyrtong na ka 5- Sutnga Saipung Constituency.
Ka kong Santa Mary Shylla, lem bad ki nongkitkam jong ka party, ki ai mynsiem ïa ki paidbah ba kim dei ban sngew noh mynsiem bad kim dei ban duh jingkyrmen, kim dei ban sngew artatien bad ong ruh ba ka party mynta ka dang khlaiñ hi kumba ju long.
Ki nongkitam jong ka party National People’s Party East Jaiñtia Hills District, kiba la jied thymmai, ki kynthup, u President, u bah Seiborlang Shadap (MDC Sutnga-Narwan), General Secretary, u Dr Sankey Shangpung ( MDC Bataw Lakadong ), Working President, u bah Joinriwell Pyrtuh, ki nongkitkam jong ka NPYF East Jaiñtia Hills District pat ki kynthup, u President, u bah Emlangky Lamare (MDC Narpuh Constituency), General Secretary, u bah Rio Shadap, ki Working President, ki kynthup u bah Defender Pakem bad u bah Kermiki Dkhar, Vice President, u bah Daiapherbha Lamare, Assistang Secretary, u bah Merary Sutnga.
La jied ruh ïa u President jong ka 5-Sutnga Saipung Block, u bah Syrsse Lamare, Assistant Secretary, u bah Metipbha Supooh, Vice President, NPP Narpuh Circle, u bah Romeo Pdang.