Shillong, Rymphang 07: Ka Kong Bethleen Dkhar ka Kyrtong jong ka Congress na West Shillong Constituency ka la ong ba ka mat kaba kongsan bad kaba hakhmat eh ba ka buh na bynta ki paidbah ka constituency ka long ban pynkupbor ïa ki kynthei bad ïa ki samla bad ban peit ruh ïa ka jingshong shngaiñ jong ki nongshong shnong hapoh ka West Shillong Constituency.
Haba kren sha ki lad pathai khubor hadien ba la dep ban thep kyrteng na ka bynta ban ïakhun ïa ka elekshon sha ka ïingdorbar thaw aiñ jong ka jylla ka ban sa long ha ka 27 tarik u Rymphang, 2023, ka Kong Bethleen ka la ong, “kum a long kmie kaba mih sha khmat nga sngewthuh ïa ka jingeh ki kynthei kaba ki ïa kynduh namar kata ka daw ka donkam ka jingpynkupbor ïa ki la ha ka liang ka kamai kajih ne ka shong shngaiñ shong suk jong ki.”
Shuh shuh u la ong ba ka jingjyllei ki samla kiba ym donkam don jam ka dei kawei pat ka mat kaba ka hap ban ïakhun pyrshah da kaba kan wanrah ïa ki lad ai kam bad ban ïarap ba kin ïeng ha la ki jong ki kjat.
Ka la ong ruh ba kumba baroh ki tip ba ka constituency kaba ka ïakhun ka dei kaba shong khleh jaidbynriew na kata ka daw ka donkam ban don ka jingshong suk shnong shngaiñ jong baroh ki jaidbynriew bad ong ba kane ka dei ka mat aba ka i donkam palat ban shim khia.
“Ngam lah ban kynthoh halor ki jingtreikam u MLA namar ki paidbah ki la ïohi hi bad ki la mad ruh ai ba u paidbah hi un ai ka jubab kaba shai ha ka 27 tarik,” jubab ka Kong Bethleen haba pan jingkynthoh halor ka jingtreikam u MLA ba la hiar shuki.
