Shillong, Rymphang 7: Ka Kong Sarita Lyngdoh kaba long ka kurim jong u MLA barim ka Mawlai u Bah FS Cajee ha ka sngi Baar ka la ai jingkyrshan ïa u kyrtong jong ka National People’s Party (NPP) na Mawlai Constituency u Bah Teiborlang Pathaw.
Ka Kong Sarita kaba la ïakhun ïa ka elekshon ha u snem 2018 na ka party Peoples Democratic Front (PDF) ka la ïoh 6336 vote. Dang shen, u MLA barim ka Mawlai u Bah Embhahlang Syiemlieh bad u kyrtong jong ka KHNAM u Bah BL Nongbri kiba u Bah Teiborlang Pathaw u la ïakhun pyrshah ha u snem 2018 ki la ai jingkyrshan ïa u mynta ka kynti.
Da ka jingai jingkyrshan jong kine ki lai ngut bad ki jingpynïasoh jong kiba bun ki nongïalam na kiwei pat ki party ka la nang aibor bad mynsiem shuh shuh ïa u Bah Teiborlang Pathaw ban ïakhun ha kane ka elekshon pyrshah ïa u kyrtong ka UDP u Bah Process T.Sawkmie uba long ruh u MLA jong ka Mawlai Constituency uba dang shu dep resaiñ ha kine ki khyndiat taiew.
Ka Kong Sarita ka la pynbna paidbah ïa ka jingai jingkyrshan ïa u Bah Teibor Pathaw ha ka jingïalang ba la skahi lang da ki spah ngut ki nongïalam bad ki nongbud jong ka.
Haba kren ha ka jingïalang ba lyngkot, ka Kong Sarita ka la ong ba ki nongkyrshan ki la kyntu ïa ka ban pynkhih bad pynbna paidbah ïano ban kyrshan, hadien ba ka la shim ïa ka rai ban ym ïakhun shuh ïa ka Elekshon namarba ki nongkyrshan jong ka ki donkam ïa ki nongmihkhmat.
U Bah Teibor haba kren ha kane ka jingïalang u la ai khublei bad pynpaw ka jingsngewnguh ïa ka Kong Sarita kaba la ai jingkyrshan ïa u ha kane ka kynti bad ha kajuh ka por u la ñiewtang ïa ki kam kiba u Bah FS Cajee u la leh na ka bynta ka Mawlai Constituency.
U la ong ruh ba un sa buddien ïa ka kaiphod treikam jong u Bah FS Cajee khnang ban dup lah ban pynurlong ïa ki kam bad ki jingthmu kiba u Bah Cajee u la angnud ban pynkylla dur ïa ka Mawlai Constituency baroh kawei.
