New Delhi, K’lyngkot 06: Ka Supreme Court jong ka ri India mynta ka sngi, ka la pynsangeh noh ïa ka hukum jong ka High Court of Meghalaya halor ka jingïasoi soskular ka Meghalaya bad Assam ban ïapynbeit ïa u pud u sam.
Ha kine ki bnai kiba ladep, ka ïingbishar jong ka Meghalaya ka la pynsangeh shuwa ban pyntreikam ïa ka MoU kaba la ïasoi hapdeng u Conrad Sangma bad u Himanta Biswa Sarma ha 29 tarik u bnair Lber jong u snem 2022, kaba dei ka jingïapynbeit ïa ki 6 tylli ki jaka kiba la don ka jingïakajia pud la bun bun snem.
Ka Bench kaba kynthup ïa u Chief Justice u DY Chandrachud, u Justice PS Narasimha bad u Justice JB Pardiwala ka la rai ban pynsangeh noh shuwa ïa ka hukum jong ka High Sourt of Meghalaya.
U Solicitor General ka India, u Tushar Mehta, uba la ïasaid na ka bynta ka sorkar Meghalaya, u la ong ba kane ka MoU kaba la ïasoi kadei ban ïapynbeit na ka bynta ki 6 tylli ki jaka kiba la don hapdeng ka jingïakajia la bun bun snem bad kadei ka rai kaba la shim da ki bor kiba ïalam ïa ka jingsynshar.
U nongïasaid na ka bynta ki nongujor, u Pragyan Pradip Sharma, u la ong ba kane ka MoU kam shym la ïoh ïa ka jingmynjur jong ka Parliament, namar katkum ka Article 3 jong ka Riti Synshar ka ri India. U la ong ruh ba lada ym lah ban bud katkum ki jingbthah ka Article 3, ka MoU kam lah satia ban treikam. U Sharma u la ong ruh ba lyngba kane ka MoU,ki jaka jong ki riewlum la pynkylla noh sha ki jaka jong ki bym dei ki riewlum. U la ong ruh ba ka don ka jingthombor da ki ophisar Pulit ïa ki paidbah namar ba ym shym la bud ïa ka rukom phiah ïa ki jaka.
Katba u nongïasaid na ka liang jong ka sorkar Assam pat u la ong ba kane ka MoU kam dei satia kaba pynbeit thymmai ïa u pud u sam, hynrei kadei kaba shu ïapynbeit ïa ki jaka kiba don hapdeng ka jingïakajia ne ka jingbymshai ïa u pud u sam. U la ong ruh ba lyngba kane ka jingïateh kular, katto katne ki jaka kiba don ha Assam kin hap noh sha Meghalaya bad katto katne ki jaka ba hap ha Meghalaya kin hap noh sha Assam. “Kadei ka jingïapynbeit bad sngewthuh hapdeng ki artylli ki jylla”, u la ong.
U Chief Justice Chandrachud, haba ai ïa kane ka hukum, u la ong ba ka don ka jingshisha ba ka hukum jong ka High Court of Meghalaya kam shym ai ïa ki daw kiba biang balei ka pynsangeh ïa kane ka MoU lane um shym la pynpaw ruh la kane ka MoU ka donkam ne em ban peit ne ïoh jingmynjur da ka Parliament.
U Chief Justice u la ai por artaïew ban jubab ïa kane bad kat haudh kata ka por, ïa ka hukum jong ka ïingbishar na Meghalaya yn pynsangeh noh shuwa.
Ka MoU kaba la ïasoi ka long ban pynbeit ïa ki 6 tylli ki jaka ba don ka jingbymshai halor u pud u sam bad kine ki jaka ki long ka Tarabari (4.69 sq km), ka Gizang (13.53 sq km), ka Hahim (3.51 sq km), ka Boklapara (1.57 sq km), ka Khanapara-Pilangkata (2.29 sq km) bad Ratacherra (11.20 sq km).
