Jowai, Nailar 13: Ki nongïalam shnong kiba don ha khappud bad ka Ri Bangladesh kiba kynthup ïa ka shnong Amsku, Kyrweng, Hawai Bhoi, Hawai Sutnga, Lumpyng-ngad, Pasadwar bad Muktapur ha kane ka 10 tarik u Nailar kila ïamih ban leit pynsangeh noh shi syndon ïa ka jingtih nala ban thep ïa ki cable phone ha shi linter jong ka surok khappud.
La ïathuh da kitei ki nongïalam shnong kane ka jingtip nala ha shi lynti ka surok ba ïaid na kitei ki shnong kala buh jingeh pynban ïa ka ïaid ka ïeng jong ki kali ki mator, nalor ka jingkhim ka surok kaba long (one way).
Bun sien ki kali ba ïaid lynti ki shait liat ha kitei ki thliew nala ban thep ïa ki Cable Phone bad ki don ruh ki kali kiba sahkut ha shiteng lynti na ka jinghap hapoh kitei ki thliew, lyngba kane ka jingkynduh jingeh ki paidbah, kum ki nongïalam kim banse shuh ban mih shakham ban leit khang noh ïa kane jingtip nala (Cable).
Kitei ki nongïalam shnong kila dawa jur ba ki bor ba pyntrei ïa katei ka jingtih nala Cable ba kin sangeh noh shi syndon lym kumta kin sa leh ïa kaba don kam, ha ka juh ka por kila dawa lada kin dang bteng ïa ka kam ‘kim bit shuh ban leh da kane ka system nala, hynrei ki dei ban leh noh da ki shrot paia system’ ka bym ktah ïa ka leit ka wan jong kiba buh ba lang.
Katei ka surok khappud nalor ba ka long kaba riat bunsien ha ka por slap kala wanrah ïa ka jingtwa ka khyndew bad ki maw kaba wan jia man ka por, wat ka rukom pyntrei ïa ka surok da ki Contractor kam long kaba shngaiñ ïa ka leit ka wan.
