Nongstoiñ, Nailar 13: Naduh ba ka sorkar ka la pynmih ïa ka jingpynbna paitbah ban ym shah shuh ban tih maw, tih shyiap hapoh ka jylla, ki nongïalam ka Synjuk Nongbylla Shyiap & Maw West Khasi Hills District, mynta ka sngi ki nongïalam katei ka synjuk ki la pynlong da ka jingïalang ha Bishop Hall New Nongstoiñ ban ïatai sani bad ban ïapyrkhat kumno kin leh.
U bah Pynlangbor Nongbri President ka synjuk la ïadon ryngkat da ki nongïalam ka Joint Action Committee Stone Crusher Owner Quary & Worker Association jong ka rilum Khasi bad Jaiñtia, ba kynthup ïa u bah D.Kharkongor u ba dei u President, bah Eugenstar Kurkalang bad kiwei kiwei.
Ha katei ka sngi la ïoh ïa ka jingpynshai na u bah Moslandar Margnar uba dei u nongai buit ka Synjuk nong bylla Shyiap & Maw West Khasi Hills District halor ka jingeh ba ki paitbah nongbylla ki ïakynduh, naduh ba ka sorkar ka la pynmih ïa ka jingpynbna ba la khang ban tih maw tih shyiap bad kiwei kiwei ki marpoh khyndew.
Nalor kata la ïoh ruh ïa ka jingkren na u bah Egenstar Kurkalang, ha kaba u la ong ba ka jingshah khang tih maw, tih shyiap ka dei ka jingeh kaba la ktah ïa baroh salonsar ym tang ïa ki nongbylla kiba bylla mynsngi bam mynmiet, hynrei ka la ktah ruh wat ïa ki jaka tyllait maw haduh ki kontraktor ruh.
U la ong ruh ba kaba lyngngoh ka long ba katei ka aiñ ka la ktah bha tang ha ri lum Khasi bad Jaiñtia. Katba ha ri lum Garo pat haduh mynta kam pat da ktah than. Shuh shuh u la ong ba ka jingkhang jong ka sorkar ban tih maw, tih shyiap ka dei ka jingpynkheiñ ïa ka hok jong ki nong bylla.
U la ong ruh ba ka por ka la dei ba ki paitbah ki hap ban ïamih madan ban dawa na ka sorkar ba ka dei ban weng noh shisyndon ïa katei ka aiñ bad kat ba kam pat weng kin dei ban ailad hynrei kin ïai dawa haduh ba kin da ïoh ïa ka hok.
Ha kaba ïadei bad katei ka mat la ïoh ruh ïa ka jingpynshai na u bah D.Kharkongor ha kaba u la ong ba naduh ba ka sorkar ka la pynmih ïa katei ka aiñ ki nongbylla tih maw, tih shyiap na ki jaka lajong, ki la kylla long pynban kum ki nongtuh ha khmat ka sorkar bad wat la ki trei na ki jaka la jong ruh, ki trei da ka jingsheptieng bad ka jingsheptieng jong ki paitbah ïa ki briew sorkar ka la long thik kumba sheptieng ki khnai ïa ka miaw.
U la ong ruh ba da ki spah ki longïing longsem kiba im da kaba bylla tih maw bad tih shyiap naduh ba ka sorkar ka la khang ki la hap ban pynpep skul noh ïa ki khun namar kim lah shuh ban kyrshan skul ïa ki.U la ong ruh ba ha kine ki sngi ki don ki nongbylla tih maw tih shyiap kiba ong ba ha ka banse ki hap ban thom ïa ka sang namar mano bal ah ban shah ïa ka jingthngan.
Hadien ka jingïatai bad ïathir snai bha ka jingïalang, ka la ïakut ba ha ka 19 tarik mynta u bnai baroh ki nongbylla tih maw, tih shyiap na West Khasi Hills kin leit ban ïashim bynta lang ha ka jingïalang paitbah ha Kynton Umon East Khasi Hills, kaba la khot da ka Joint Action Committee Stone Crusher Owner Quary & Workers Association. Ha katei ka jingïalang kin sa shim ïa ka rai kumno kin leh lada ka sorkar kam sngap ïa ka jingdawa jong ki paitbah.
