Twa ka khyndew ktieh bad ki maw heh ha surohbah NH-6 ha Kuliang, sahkut da ki hajar tylli ki kali

Khliehriat, Nailar, 13: Ka la don ka jingtwa khyndew ktieh kaba jur bha ha shnong Kuliang East Jaiñtia Hills District bad ka khyndew ktieh, ki maw ba heh ba heh bad ki dieng ki la syntuid nalor ki lum bad kah lynti ïa ki kali ba ïaid lyngba na ka surok national highway ha katei ka thaiñ, kane ka la jia ha ka sngi U Blei naduh ka por kumba 6.30 mynstep.
Ka MLA jong ka Sutnga-Saipung constituency, ka kong Santa Mary Shylla, u Deputy Commissioner ka East Jaiñtia Hills District, u Shivanh Awasthi, IAS , u Superintendent of Police East Jaiñtia Hills District, u Giri Prasad, IPS lem bad ki heh jong ka NHAI ba kynthup u Project Director, u Aanand Singh Chauhan bad u Consultanat NHAI, u Vijay Solanki, mynta ka sngi ki la leit hiar jurip ïa ka surok national highway ha ka thaiñ Narpuh, ki la lap bad sakhi ïa ka jingsniew ka surok kaba la long shaba palat bad la lap ruh ïa ka jingtwa khyndew ha kiba bun ki jaka bad ha kane ka jingjurip ki la lap ruh ïa ka jingtwa khyndew kaba jur bha kaba la jia ha Kuliang ha kaba ka khyndew ktieh, ki maw , ki dieng ki la kah lynti ïa ka surok ba ïaid ki kali.
La lap ruh ba wat haduh katne ka jingjur katei ka jingtwa khyndew ha Kuliang hynrei ka National Highway Authority of ndia ka la pyntrei tang kawei ka JCB kaba pynkhuid ïa ka khyndew ktieh bad ki maw, kane ka jingpyntrei tang kawei ka JCB ka buh jingeh bha namar kan shim por slem ban pynkhuid namar ba ka jingtwa ka la jur bha bad kumta na ka liang u DC bad ka MLA ki la bthah ïa ki heh jong ka NHAI ba ki dei ban buh bun tylli ki JCB bad ki excavator ban dup lah ban pynkhuid kloi ïa ka khyndew ba twa.
U Shivanh Awasthi, IAS u la ong ba kane ka jaka ha Kuliang ka dei kaba ju jia khah khah bha ka jingtwa khyndew bad ha ka jingjurip la iohi ïa ka jinglong jingman ka surok bad na ka liang ki bor district ki ju iakren bad ka NHAI na ka por sha ka por “Nga la dep bthah ruh 0239a ki heh ka NHAI ba nangne shakhmat donkam ban buh bun ki JCB bad excavator ha Kuliang, kata na baroh ar liang ka surok , namar kane ka jingtwa ka khyndew ktieh ka lah ban jia biang ha kano kano ka por lada hap u slap ba jur” u la ong ruh ba ki kali ki lah ban iaid ynda la dep ban pynkhuid ïa ka surok.
Ha kaba iadei bad ka jingshna ïa ki nala tuid um, u DC u la ong ba ka kam ka la nang iaid shakhmat bad ynda la kham duna u slap kata ha u bnai nailur ki kam kin iaid beit shaid shaid ha kaba maramot ïa kane ka surok.
Na ka liang u S.P, Giri Prasad, u la ong ba u la dep bthah ïa ki pulit jong ka Ratacherra bad ki pulit Umkiang ba kin pynphai noh ïa ki kali ba kin iaid noh da kawei ka lynti lada donlad namar kane ka jingtwa khyndew kan dang lah ban jia biang lada jia ba hap slap, u kyntu ruh ïa kiba ñiah kali ba ki dei ban long phikir bad long adkar bha haba ñiah kali bad tang shu dep ban pynkhuid ïa kane ka khyndew ktieh, ïa ki maw, ki dieng ki kali kin sa lah ban ïaid, la ong ruh ba lada long kaba lah kan bha ban kiar shwa ban iaid na kane ka surok na Narpuh tat haduh ban da lah ban pynkhuid lut ïa ka khyndew ktieh, ki maw ki dieng kiba kah ha lynti.
Shuh shuh, na ka liang u Project Director NHAI, u Aanand Singh Chauhan, u la kren shai ba ïa mynta hi ym lah ban shna ne maramot bha ïa ka surok namar ba dng jur palat u slap bad u la ong ba ka jingpyntrei kaba kham bha ym sdang naduh u bnai nailur kata ynda la kham duna u slap, watla kata ruh ka jingpyntrei ïa ki nala tuid um ha Lumshnong bad ha kiwei ki jaka ka dang ïaid shaid shaid, u la kular ruh ban buh shuh ki JCB bad ki excavator ha ka thaiñ Kuliang ban long peitngor ïa kane ka jaka ba don jingtwa ka khyndew ktieh namar kane ka dei ka jaka kaba ju jia khah khah ka jingtwa khyndew ha ka thaiñ.
Kumjuh ruh na ka liang ka kong santa Mary Shylla, ka la ong “Nga sngewthuh haduh katno ka jingeh ki paidbah kiba iaid na kane ka surok bad ka jingeh ki paidbah ka thaiñ ha kaba iadei bad kane ka surok, nga kyrpad ruh ïa ki padibah ba kin sngewbha ban long kiba iaishah ha kaba iadei bad kane ka jingtwa khyndew namar ka lah ban shipor ar ne lai kynta ban pynkhuid ïa kane ka khyndew ktieh”, hakajuh ka pork a MLA ka la kubur ruh ba ka jingsniew ka surok NH-6 ka la long ha baroh shi lynter ka surok, ki bun ki jaka kiba la dap sa da ka um ktieh ba lang bad ha kaba iadei bad ki jingkieng ka la ong ba kumba la ong da u Project Director ka NHAI ïa mynta hi ym lah leh eiei bad kan shimpor kumba saw bnai ban maramot pynbha ïa ka surok ha ki bynta ba don ki jingkieng “Na ka liang jong nga ruh nga sngew khia ïa kane bad nga kyrmen ba ha kane ka tlang ban wan ka surok kan sa kham bha”
Kum ban shu bynrap, ka jonglong jingman ka surok NH-6 ha East Jaiñtia Hills District ka la sinew shaba palat bad buh jingma shisha ïa kiba leit ba wan, khamtam ha ka tnaiñ Sonapyrdi, Kuliang, Pyrtakuna ter ter shaduh malidor ka surok ka la sinew shaba palat bad ruh ka buh jingma ruh namar lada jia ba hap slap ha kano kano ka por ka khyndew ktieh, ki maw, ki dieng ki lah ban hap ne syntuid sha surok, ka long kaba sisha kumba ong u SP ba kiba ñiah kali ki dei ban adkar bad husiar bha haba ñiah kali ha katei ka thaiñ ka kaba kum kame ka jinglong ka suiñ bneng ba hap slap namar haba don ka jingtwa khyndew ka lah ban wanrah ruh ïa ka jingdheng kali kaba da ki bun kynta.