Shillong, Ïaiong 25: U Chief Executive Officer jong ka kompnei ba pynïaid ïa ki lieng suiñ Indigo u Pieter Elbers la ong ba ka jingshah jied ka Shillong kum kawei na ki nongbah ba ka kompeni kan ïarap ban pynphriang paidbah sha satlak pyrthei kum kawei na ki nongbah ba intynnad khnang ba ki briew a satlak ka pyrthei kin tip shapahnga kane ka nomngbah bad ban pynskuiñ ïa ka jingmut jong ki ban wan jngoh ïa ka Shillong bad ka jylla hi baroh kawei.
Haba kren sha ki lad pathai khubor hadien ba ka kynhun jong ka Indigo ka la pyndep ïa ka jingïaid kajat ban leit jngoh ïa ka jyntei mynbarim ne Heritage Site lyngba ka prokram kaba ki la tip kum ka My City My Heritage, u la ong ba ka Indio ka la shim ïa ka sienjam ban pynbna pyrthei da kaba kin buh ha khmat duh jong ka jynsop ka makasain ba ki buh ha ka liengsuiñ kaba yn thoh Welcome to Shillong na bynta shi bnai kynthih.
“Da kane ka jingbuh jong ngi ha ka jynsop ka makasin man ka sngi ki nongleit nongwan ba 2.8 lak kiba pyndonkam ïa ka liengsuiñ jong ngi kin ïohi ïa ka Shillong bad da kane nga ngeit skhem ba kan pynlong ïa ki ban kwah tip shuh shuh sha phang ka Shillong bad ba kin wan jngoh hi dalade.” ong u Elbers.
Ha kane ka jingïaid kjat ban jngoh ïa ki jyntei ki men barim kiba don ha ki bynta ka nongbah ki kynthup ïa ka All Saint Cathedral, ka Cathedral of Mary Help of Christan, ïa ka Khyndai Lad, hynrei na ka daw ka jingpynthut noh u slap kim shym la lah ban pyndep lut ïa ka jingleit jngoh ïa kiwei pat ki jaka kum shi bynta ban pynbna pyrthei ïa ka jingitynnad kine ki jaka kiba don ha Shillong.
