Dei ban buh kyndon ïa ki MLA shwa ban pynïasoh sha ka NPP ong ki nongkyrshan ka PDF.

0

Shillong Iaiong 25: Hadien ba ki khubor kila saphriang ba ki MLA ka seng kin leit pynïasoh noh sha ka NPP, ki nongkyrshan ka PDF ki la pynpaw ba kim dei ban leit bud tynneng ïa ki MLA jongki hynrei kin buh da ki kyndon.
U General Secretary ka PDF Mawkynrew Zonal Committee u bah Dengbok Kurkalang, ula ong, “Lada poi u pud haduh ban pynduh ïa ka seng PDF ban rung noh sha ka seng NPP, ym dei ban shu leit bud beit, hynrei dei ban don ruh da ki kyndon. Ka PDF ka don ar ngut ki MLA kiba kynthup ïa u bah Gavin M Mylliem na Sohra constituency bad u bah Banteidor Lyngdoh na Mawkynrew Constituency.
Kine ki nongïalam ka PDF kila pynpaw ba ka la don ka jingkhroh jong ka seng NPP ban pynïasoh noh bad ki haba pyntip ba ka jingïakren ka dang ïaid shakhmat.
U Bah Kurkalang ula ong, watla kam pat don kano kano ka jingïalang ban ïakren ïa kane ka kam, hynrei kan ym don ïa kano kano ka jingpyrshah ban leit rung sha ka seng NPP lada ki nongïalam ka PDF ki sngew ba dei ban shim ïa kum katei ka rai.
“Lada ki la rai ban leit ïasoh noh bad ka NPP, ngim dei ban shu shah ba kin leit pyniasoh suk hynrei ngi donkam ban buh ryngkat bad ki kyndon” ong u bah Kurkalang.
Ula pynshai ruh ba ha Mawkynrew Constituency ki paidbah kim shym la jied ïa ka seng hynrei ki la jied ïa u briew bad ka jingjop u kyrtong kam shong ha ka seng hynrei ka shong ha ka jinglah ka jongu kum u briew.

Leave A Reply

Your email address will not be published.