Ka NPP ka dang thymmai ha Sohïong bad u kyrtong jong ka ruh u bym don nongrim: Sandondor

Kumba pynshaïong ka Mawlai kan jia ruh ha Sohïong

0

Shillong, Ïaïong 25: U Kyrtong ka Hill State People Democratic Party (HSPDP) u Bah Sandondor Ryntathiang u la ong ba wat la ka National People Party (NPP) ka la jop bun tam ki MLA ha kane ka elekshon ba dang shu dep bad kaba la ïoh ban synshar 5 snem ïa ka jylla hynrei haba phai pat sha Sohïong, ka NPP ka dei ka party ka dang thymmai bha bad ki paidbah kim pat pdiang satia.
U la ong ruh ba u kyrtong ka NPP u Bah Samlin Malngaing u dei u bym don nongrim satia bad ïa kane lah ban sakhi da ka jingieh noh jong u ïa ka nongrim kaba la pynjop ïa u ha u 2018 ban leit pynïasnoh pat sha ka NPP.
Haba kren sha ki lad pathai khubor ha ka sngi Ba-ar u Bah Sandondor u la ong ba kumba long ha Sohïong ka NPP ka ïoh tang ïa ki briew ka HSPDP bad wat kiba bun ki briew bad ki nongtrei ka HSPDP ki dang don bad ka party haduh kine ki sngi kiba mynta.
“Kumba long haduh mynta ki paidbah ka Sohïong kim pat pdiang satia ïa ka NPP bad lada peit ïa ki nongtrei bad nongkyrshan kiba ka ïoh ruh ki dei beit ki katto katne ngut ki nongkyrshan ka party jong ngi hynrei namar ka HSPDP ruh ka sei ïa nga kiba bun hi ki nongtrei ki dang don bad ngi,” ong u Bah Sandondor.
U la ong ruh ba lada peit na ka elekshon kaba dang shu dep la sakhi ba ki paidbah ha Khasi Hills lait noh ha Ri-bhoi tang khyndiat ngut ki ki kyrtong jong ka NPP kiba poi sha ka thong.
“Ka jingjop ba khyndiat ngut ka NPP ha Khasi Hills hi pyni shai kdar ba u paidbah kine ki lum um pat pdiang ïa kane ka party bad kane ka long kumjuh ha Sohïong ruh.” u la ong.
Haba kylli ïa ka jingdon lang ka HSPDP ha ka sorkar MDA ba la ïalam da ka NPP, “Kane kan ym ktah eiei bad baroh ngi tip ba kane ka pateng kaba ngi im ka dei ka juk jong ki sorkar synrop bad ym tang ha Meghalaya hynrei sha kiwei pat ki bynta ka ri ruh, bad ka jingïatreilang ka HSPDP bad ka NPP kam ktah satia namar ka jingleit ïasnoh ki MLA ruh ka dei ryngkat ki nongrim,” u la jubab.
Haba kynthoh ïa ka rukom ïalap elekshon jong kiwei pat ki party ha Sohïong, u Bah Sandondor u la ong, “Lada phi peit ha kane ka jingïalap elekshon ha Sohïong ki nongïalam jong kiwei ki party ki pyndonkam da ki kyntien kiba pynhiar dor shibun ïa ka kam synshar khadar,” ong u Bah Sandondor.
“Ha ka jingïalap elekshon kam don ka jingkren ïa ki mat kiba ktah ïa ka jylla lada phi peit ha kaba ïadei bad ka bym ïohkam ki samla, lada phi phai ha kaba ïadei bad ka Them Motor ne ka Roster ne ka kam pud kam sam ym don mano mano ba kren namar ha kiwei ki party ki mat ba ktah ïa ka jylla kim shimkhia namar ki shim ba ka elekshon ka dei tang ka tamasa pynbieit paidbah,” u la bynrap.
Haba kylli ïa ka nongrim kaba ka HSPDP ka ïeng ha kaba ïadei bad ka Roster System bad ka Reservation u Bah Sandondor u la ong, “Dei ba ngi la ïohi ïa ka jingnoh shiliang jong ka Reservation ba ngi sa pynrung ha ka kular elekshon bad kum ka party lei ngi ngeit ba namar ngi don la ka jong ka jinglong kyrpang bad ki Garo na kata ka daw ban pynïoh ïa ka bhah ba 100 Percent ha ka bhah kam ba ngi sa dawa ïa ka jylla la ka jong.”
Haba kylli pat la ka don ne em ka jingtreikam ka bor pisa ha kane ka elekshon, “Ka pisa man ki constituency kan don beit bad ka jingtheh na ki party heh spah ruh kan jur bha hynrei kam mut ba tang ba ki kyrtong heh spah ki la theh pisa kin jop beit namar ha kane ka elekshon kaba dang shu dep ngi ïohi ba ka don ka jingtheh pisa kaba jur ha kiba bun ki constituency hynrei ki jop pat ki kyrtong bym theh pisa bad nga don ka jingsngew skhem ba kumba ha Mawlai u MLA ba jop u lah ban pynjop ïa ki bor pisa kane kan jia ruh ha Sohïong bad kan pynshaïong ruh ïa kiba bun,” la jubab u Bah Sandondor.

Leave A Reply

Your email address will not be published.