SHILLONG, Risaw 18: Ki ar kol na u Rapborlang Marwein ka la biang pura ïa ka MLP FT ban jam sha ka wat ïakhun namlahduh ha ka lympung phutbol Second Division 2024 jong ka Shillong Sports Association.
Kane la pynthikna hadien ba ka MLP FT ka la pynliem noh ïa ka Jongksha SC da 2-0 kol ha ka jingïakhun semi final kaba la long ha ka sngi Thohdieng (18 tarik Risaw, 2024) ha SSA Ground, Polo-Shillong.
Watla ka jingïakhun ha ka kylla step ka la kut ha ka jingïakhaid, ka MLP FT ka la wanphai da kaba tyngeh ha ka kylla miet ban pynkhih ïa kitei ki ar kol lyngba u Rapborlang Marwein (77 bad ha ka 79 minit).
Da kane ka namjop ka MLP FT kan pynkhreh sa ïa jingïakhun na bynta ka burom lahduh, bad kan ap khmihlynti ïa ka Nongkrem SC lane ïa ka Laitkyrhong SC ban aireng pyrshah ha ka final jong ka SSA Second Division 2024.
Ka semi final kaba ar kan long ha kane ka sngi Saitjaiñ, ha kaba ka Nongkrem SC bad ka Laitkyrhong SC kin ïakhun ha ka por 2 shiteng mynsngi.
