Pynrem jur u Myntri Rangbah ïa ka jingthang ïa ka IGCC bad pynpra ïa u mot dur u Tirot Sing ha Bangladesh

Shillong, Nailar 07 : U Myntri Rangbah ka jylla u Conrad K Sangma la pynrem jur ïa ka jingshah thang ka Indira Gandhi Cultural Centre ha Dhaka bad ka jingshah pynpra u dur mot jong u Tirot Sing Syiem ka hima Nongkhlaw ba dang shu dep tei bad plie paidbah mynta hi u snem ban pynsah jingkynmaw ïa ka jingshah set phatok jongu ha Bangladesh ha ka sorkar phareng.
Kumjuh ruh u Myntri ka Tnad Arts bad Culture Bah Paul Lyngdoh ula pynthikna ia ka jingshah pynpra u mot sah jingkynmaw jong u Khla wait ka Ri-lum Khasi Tirot Sing Syiem, uba pynïeng ha phyllaw ka Indira Gandhi Cultural Centre (IGCC) ha Dhaka.
Une u mot u dei uba dang shu plie ha ka 16 tarik Rymphang hynrei ula shah pynpra ha ki kynhun nongïakhih ka Ri Bangladesh-kaba don mynta hapdeng ka jingïaumsnam- kiba la thang dusmon ruh ïa ka Indira Gandhi Cultural Centre.
Haba kylli, u Bah Paul ula ong “Nga dang shu ïohi ïa ka video bala phah da uwei u nongpathai khubor kaba pyni ïa ka jing shah pynpra dusmon ka IGCC bad ruh u mot jong u Tirot Sing Syiem.
La ong ba katei ka jingïakhih i kumba ka dei ka jingïakhih pyrshah ïa ka Ri India namar ha kane ka jingïakhih, kila hiar thma ïa ka Indian High Commission, ia ka Indira Gandhi Cultural Centre (IGCC) ba une u mot sahnam u ïeng ha phyllaw ka Centre.
U la ong ruh ba kat kum ka video la sakhi ba u mot ula shah pynpra phom hynrei tang u maw thoh kyrteng jong u Tirot Sing u dang don kumba u long, kane ka jingleh ka dei ka jingleh riew khlaw jong ki nongïakhih hapoh katei ka ri Bangladesh.