Shillong, Nailar 07 : U Myntri ka tnad Bording ba dei ruh u MLA jong ka Phulbari constituency, u AT Mondal ha ka sngi Balang u la ong ba ka jingpyndep noh ïa ka jingkieng Phulbari kan wanrah shibun ka jingmyntoi khamtam ban kyntiew ïa ka ïoh ka kot nalor ba kan pynsuk ïa ka leit ka wan jong ki paidbah ba sah kham pajih.
Haba ïa kren bad ki lad pathai khubor, u Mondal u la ong ba ka jingtrei ïa ka jingkieng Phulbari ka ïaid sted bha bad kumta ki khmih lynti ba yn lah ban pyndep ha ka por ba la buh.
Shuh shuh u la ong ba hadien ba la dep kane ka jingkieng kan pynsuk ïa ki paidbah ban poi sha kiwei pat ki bynta jong ka ri lyngba ki bynta phang sepngi jong ka jylla.
Ka jingjrong jong katei ka jingkieng ka long 19.3 kilometer kaba sdang na Phulbari bad kut ha Phulbari Assam ïa kaba la buh thong ban pyndep ïa ka ha u snem 2027-2028.
“Kane kan ai jingmyntoi shibun eh ïa ka jylla baroh kawei, khamtam ïa ka thaiñ Garo Hills, kumta ngi khmih lynti ba kan don shibun ki kam kamai hadien ba la plie ïa ka jingkieng bad kan pynduna ïa ka jingjngai ban leit sha ka bynta phang sepngi jong ka jylla bad wat sha kiwei ki bynta jong ka Ri,” u la ong.
U Mondal u la pyntip ba katei ka jingkieng ka dei ka bynta ba pynïasoh ïa ka surokbah National Highway 127 b kaba sdang na Srirampur Assam khappud jong ka West Bengal bad kaba kut ha Nongstoin West Khasi Hills Meghalaya.
Shuh shuh u ong ruh da kaba klet noh shwa ïa ka jingkieng, ka surok kadei ka bynta ba kongsan na bynta ka Meghalaya hi.
