Pynrem jur ka shnong Nongsder, dawa pynshitom ïaki briew ba donkti ban buh karkhana shna kyiad beaiñ

Nongpoh, Rymphang 05: Tang hadien ka jingleit khynra jong ka tnad Excise ka Ri-Bhoi District lem bad ka tnad Excise jong ka jylla Assam ïa kawei ka jaka shna kyiad beaiñ ha Ri-Bhoi haka sngi u Blei, hajan lad Umroi kaba hap hapoh u pud u sam ka shnong Nongsder kaba dei ruh hadien ka jingioh bat ïa kawei ka trok kaba kit ruh ïaki tiar shna beaiñ ïaka kyiad, u Rangbah shnong ka shnong Nongsder u Bah Johnas Lyndem mynta ka sngi u la pynpaw ba kum ka shnong ka dap da ka jingkyndit bad ka jinglyngngoh kaba khraw ban iohi lyngba ki lad pathai khubor halor ka jingdon ka karkhana shna kyiad beaiñ hapoh u pud ka shnong Nongsder bad pynrem jur ruh ïaki briew ba donkti ha katei ka kam.
Haba kren sha ki lad pathai khubor mynta ka sngi ha Nongsder, u Bah Johnas Lyndem u la ong ba ka shnong kila kubur ba katei ka karkhana ka hap hapoh u pud u sam ka shnong Nongsder bad tang hadien ka jingioh jingtip naka liang ka bor shnong kila leit ruh ban khmih ïa katei ka jaka bad lap shisha ba ka don bad kum ki bor shnong kim don jingtip satia namar ka dei ka jaka kaba kynjah bad long khlaw kaba don sha rudnong bad kham pajih naka shnong.
U la ong ruh ba shnong ka pynrem jur ïaki briew ba donkti ha katei ka kam bad ai ka jingkhublei ïaka tnad Excise kaba la shimkhia ban leit khynra bad dawa ruh ba dei ban ai ka jingpynshitom kaba tyngeh ïaki briew ba donkti ha katei ka kam bad maham ruh ïakiwei ruh ba lada don kiba leh kum kitei ki jait kam kum ka shnong kam don jingmap satia namar ka jingpynjah burom ïaka shnong ka thaw hi baroh kawei.
U Bah Johnas u la ong ruh ba donbok ba lap da ka tnad Excise kaba la leh katkum ki kyndon aiñ, hynrei la jin ba lap u paidbah nga tharai kato ka iing baroh kawei kala kylla dpei.