Pynrem jur ka JNC halor ka jingkren u Symbud Myntri Rangbah halor ka mat ban wanrah lynti rel ha ri lum Jaintia

Khliehriat Naitung 20 : Ka Jaiñtia National Council(JNC) ka pynrem jur ïa ka jingkam u symbud myntri rangbah kajylla, u bah Sniawbhalang Dhar uba la ong ba ki nong Jaiñtia ki kyrpad ïa ka sorkar ban wanrah lynti rel (railway project) ha ri lum Jaiñtia, kane ka jingkam jong u ka la pynlyngngoh shi katdei ia ki nong Jaiñtia namar kam shym la don satia kum kata ka jingkwah jong ki paidbah ban wanrah ïa ka lynti rel ïoh lehse don ki katto katne ngut kiba ïadon kti lang, kiba ïadei ïajan bha bad ki politicians kiba long kum ki langïong, hynrei ka seng hi kan nym ailad ïakum kine ki kruiñ ki khwan myntoi ong u kyrwoh
Ka seng ka pynrem ruh ïa ka jingkren u Sniawbhalang Dhar uba la ong ruh ba hap donkam ban wan da ki briew kiba nabar, namar ka sorkar kan sa pynbiang ïa ki kyndon ban tehlakam. Ka seng ka buh ïa u dak jingkylli ba naduh mynno ka sorkar ka buh ïa kita ki kyndon ki aiñ ban khang khyrdep bad tehlakam ïa ka jingwan beaiñ ki bar jylla, mynta la lai snem tam lah pass ïa ka resolution ba dawa ILP, hynrei aïu ka sorkar kala leh? Ka MRSSA kam shym lah treikam haduh mynta, aïu ka sorkar kala leh”?.
Na ka liang ka JNC ka la pynpaw ruh ba ban ïa kata ka lynti rel hato balei ka sorkar kam pyrkhat ban wanrah shwa ïa kiei kiei ki ban long ki jingmyntoi ïa ki samla bad balei ka sorkar kam ai shwa iaka Government College ha East Jaiñtia Hills District bad balei ruh ba haduh mynta dang sahteng ka Residential School, ka Teacher’s Training centre ha East Jaintia Hills District.
Ka seng ka pynkynmaw ruh ba haduh katno tylli kita ki cements plant ha East Jaiñtia Hills District ki ai jingmyntoi ïa u paidbah ka thaiñ, ka seng ka pynrem jur ïa ka sorkar ba haduh mynta ka bhah thungkam jong ki samla haki to ki karkhana dewbilat (Cement plants) kaba dei hok ban ïoh ki trai ri trai muluk kam shym lah ban urlong kumjuh ruh ka jingdawa ban ai reserve 80% ïa ki nongshong shnong ka thaiñ ym shym lah pyntreikam satia, hato ka lynti rel kan ai jingmyntoi?.
Ka seng ka phah da ka kyrwoh kaba shai ba ka sorkar ka dei ban klet shwa ïa ka lynti rel hynrei ka dei ban phai khmat shwa sha ki jingeh ba ki paidbah ki mad na ka por sha ka por, phai shwa sha ki samla wad kam wad jam, phai shwa sha ki lynti ki synkieng kiba la shu pyntrei torti da ki contractors ba ïoh mon, phai shwa sha ka Civil hospital kaba tang ka nam katba ki jingdonkam pat (facilities) ym don tang kawei ruh” Pynkut ka kyrwoh na u Publicity Secretary ka JNC, u bah Mebanteilang Sukhlain.
Lah ruh ban kdew hangne ba katei ka jingpyrshah lynti rel kam dei tang ha katei ka distrik hynrei kadei ka mat kaba la khih bad pyrshah tyngeh da ki seng bapher bapher naduh ka por ba ka sorkar ka thmu ban pynpoi lynti rel lyngba ka Ri Bhoi District.