Khliehriat Kyllalyngkot 9: Ka Federation of Khasi Jaiñtia and Garo People Khliehriat Circle, ka pynrem jur ïa u Training Phawa uba la shoh pynmynsaw da u sdie ïa u Waheh Shnong Tuber Kmaishnong, u bah Miki Lyngdoh bad ïa u secretary IVCS, uba bat ruh kum u Chairman Seiñ Raij Tuber Kmai shnong, u bah Denis Lyngdoh.
“ Katei ka jingjia shah pynmynsaw kitei ki nongpyniaid shnong, ka dei tang namar ba ha katei ka miet jong ka 3 tarik u kyllalyngkot, ha ka por 11:30 mynmiet ka la don ka jing ïa huri hura hapoh Shnong hapoh thaw ha kaba kitei ki nongïalam shnong hadien ba ki la ioh jingtip ki la mih ban tem ïa ka huri hura, kitei ki nongïalam Shnong ki la leit da ka jingthmu ban pyniasuk bad pyn jai jai ïa ka huri hura, hynrei ynda ki la poi ha ka jaka ba ïa klumar ki la shah pom pynbam da u sdie ha u Training Phawa, ka seng ka sngewkhia ba ha kine ki sngi ki briew kim burom shuh wat ïa ki nongïalam shnong ruh bad ha kaba ïadei bad katei ka jingjia u bah Chelang Lyngdoh, uba dei u para jong u waheh shnong u la ujor da ka ejahar ha Ladrymbai Outpost bad katkum ka jingtip jong ka seng u tei u Training Phawa u la dep ioh i
ïa ka jamin lane ka Interim bail ka ban kut haduh ka 12/01/2024” ong u kyrwoh.
“Na ka liang jong ka seng ka kyrpad jur ïa u public prosecutor uba na ka liang ki nongujor ban pynkhlaiñ ka jingïakhun hapoh Kashari khnang ba hadien ka 12 tarik mynta u bnai u tei uba shah kynnoh um dei shuh ban lait na kti ka aiñ bad ha kajuh ka por ki Pulit kim dei ban ailad ïa kum kitei ki briew ban ioh jamin lane interim bail biang namarba la da ailad kan long pynban kum ka jing pynshlur ïa kiwei pat ban leh kam sniew ha ka imlang ka sahlang” pynkut u kyrwoh na ka Seng FKJGP.
