Nongpoh, K’Lyngkot 09: Ka Meghalaya Aids Control Society (MACS) haka jingpynlong ïaka Integrated Health Campaign naduh ka 17 tarik Risaw 2023 bala pynkut noh mynta ka sngi kala shem ba ki don haduh 6871 ngut ki nongshong shnong ka Ri-Bhoi kiba leit phah khmih ïalade naka bynta ka jingpang HIV/AIDS bad kumba 67 ngut kiba long Reactive bad 23 ngut naki ki dei kiba don ïaka jingpang ñiangkulia (HIV Positive).
Haba kren haka jingpynkut noh ïaka Integrated Health Campaign kaba la long ha Parish Hall ha Nongpoh ka Dr. E Kalwing District AIDS Control Officer (DACO) Ri-Bhoi District bad ka Dr. EA Hujon Assistant Director (Prevention) ka MACS kila ong ba ka Ri-Bhoi District kumba long mynta ka don haduh 515 ngut ki briew kiba im bad u ñiangkulia bd kiba dang don hapdeng ka jingshah sumar bad ha katei ka jingkhmih bñiah ba dang shen lyngba ka Health Mela la lap thymmai ba ki don sa 23 ngut kiba ioh ïa u ñiangkulia hadien ka jingkhmih bñiah ïa 6871 ngut ki nongshong shnong kiba la leit phah test ïalade.
Kila ong ruh watla ka Ri-Bhoi ka dang dei kaba dang duna haka jingdon ki briew kiba ioh ïaka jingpang ñiangkulia kum ki paidbah ki dei ban long kiba phikir haka kam shongkha shongman,khamtam ka Ri-Bhoi ka dei ka khyrdop ba rung ba mih sha ka jylla ha kaba bun naki nongñiah kali khamtam ki trok ki wan sha ka jylla ryngkat ki jait jingpang bapher bapher, kumta ka dei ka por ba ki paidbah kin ai ka jingïatreilang naduh ki shnong ki thaw ba rat dieng ïaka jingpang ñiangkulia, bad kito kiba ioh ïa katei ka jingpang kim dei ban lehraiñ lane rieh hynrei ban phah sumar ïalade haka por kaba biang bad kyrpad ruh sha ki paidbah ba kim dei ban ibeiñ lane ñiewbeiñ ïaki paidbah kiba ioh ïa katei ka jingpang.
