Jowai, K’Lyngkot 09: Ka Hynñiewtrep Integrated Territorial Organization (HITO) Mookyndur-Moodymmai Area hadein ba kala dep ban pan jingpynshai naka Jaiñtia Hills Autonomous District Council (JHADC) kala ïoh ïaka jubab naka Administrative Officer ba ka JHADC kam shem la buh dor lane ai bor ïaki Daloi ban shim daka dor haba pynshisha ne recommend ïa kano kano ka Dulir Khyndew.
Hakaba ïadei bad kane ka HITO hadein baka la ïoh shibun ki jingujor naki paidbah jong ka thaiñ Mookyndur Moodymmai kiba hap hapoh ka Elaka Muskut la kynnoh ba u Daloi u buh daka dor kaba heh haba u recommend ïa kino kino ki Dulir Khyndew bad kane kala pynlyngoh ïaki nongshong shnong jong ka thaiñ.
Halor kane naka liang ka seng kala pan daka jingpynshai naka Council bad la lap ba naka liang ka Council kam shem la buh dor ïaki Daloi bad kane ka jingleh jong u Daloi Muskut kadei tang ka jingleh shimet jong u khlem da ïoh jingbit naka JHADC, la ong u President ka HITO Mookyndur -Moodymmai Area u samla Bony Pakma haka kyrwoh khubor bala phah.
