Shillong, K’ Lyngkot 06: Ki shipai Border Security Force (BSF) ka Meghalaya Frontier ki la ïathuh ba ki la ïoh ban pynpulom noh ïa ki kam khaïi tuh ïa ki mar sha Bangladesh na Khappud ka West Jaiñtia Hills bad ïoh kem ïa uwei u nongkhaïi nalor ka jingkurup ïa bun bah ki mar.
La ong ba ki shipai BSF ki la pynlong ïa ka jingkhynra ha ka sngi U Blei ha ka thaiñ Nongkhen BOP kaba don hapoh ka thaiñ Riyazlong, WJH bad ïoh kem ïa uwei u briew na kawei ka kali Alto.
Shuh shuh ki shipai ki ïathuh ba kane ka kali ka kit ïa ki mar ba kynthup ïa u rynsun, ka shini, blanket, ki blade khie tmaiñ, bad kiwei kiwei.
Ïa une u briew bad ïa ki mar ba la ïoh kurup la aiti noh sha ki Pulit bad ki Custom ba kin leh ïa kaba donkam katkum ki aiñ.
