Nongstoiñ, K’lyngkot 06 : U District Election Officer ka West Khasi Hills District, bah Garod L.S.N. Dykes IAS, mynta ka sngi u la pynmih bad pyllait paidbah ïa ka thup ki nongthep vote na ka bynta ka West Khasi Hills District baroh kawei ha kaba la kdew ba ki nongthep vote hapoh ka West Khasi Hills District ka la kiew na ka ka 1,30,030 sha 1,32,073, ha kaba ka jingkiew ka long da 2,043 ngut (1.57%) kata kat haduh ka 1.1.2025.
Ki jingpynthymmai ba kongsan ha ka thup nongthep vote ha kaba ha Nongstoiñ (ST), ki nongthep vote ki la kiew na ka 45,434 ngut sha ka 45,815 ngut, kaba kiew da 381 ngut (0.84%), Rambrai Jyrngam (ST), ki nongthep vote ki la kiew na ka 41,522 sha ka 42,387 ngut, kaba kiew da 865 ngut (2.08 %), Mawshynrut (ST), ki nongthep vote ki la kiew na ka 43,074 sha ka 43,871 kaba kiew da 797 ngut (1.85%).
Ha kane ka sngi u DEO u la aiti ruh ïa ki soft copy jong ki Final Electoral Rolls sha ki nongmihkhmat jong ki seng saiñ pyrthei bapher bapher kiba don ha kane ka jingïalang, kaba la pynlong ha DC ophis.
Kiwei kiba don ryngkat ki long u bah V.Swer, MCS (ADC & Electoral Registration Officer), bah M.A. Challam, MCS (ADC & Electoral Registration Officer), bah S. Marweiñ MCS (ADC), bah E. Lyngdoh, AC (EL) & AERO, 2019.
Kane ka thup ki nongthep vote ka long katkum ka jingkheiñ na ka jinglum thup kyrpang ïa ka ka jingdon ki nongthep vote hapoh ka district kaba la buh ïa ka 01.01.2025 kum ka tarik kaba khatduh.
Mairang: Katba na ka liang ka Ophis jong u District Election Officer Eastern West Khasi Hills District, Mairang u la pyntip paitbah ba ïa ka thup jong ka jingpynkylla ïa ka Draft Electoral Roll na ka bynta ka 30-Mairang (ST) Assembly Konstitwensi, la dep pynkhreh naduh ka 1 tarik u Kyllalyngkot, 2025 kum ka tarik ban ïoh ïa ka jingbit bad katkum ka Registration Electors Rules, 1960.
Ka kopi jong katei ka thup kyrteng ryngkat bad ka list jong ki jingpynkylla la pynmih bad kito kiba kwah ban peit ne jurip ïa ki, ki lah ban leit mih sha ka ophis Electoral Registration Officer, 30-Mairang(ST) Assembly Constituency, lane ha ki jaka ba la buh kyrpang ha ka por ba longtrei.
