Pynpra ka tnad Forest 4 tylli ki karkhana otdieng be-aiñ ha ri lum Garo kurup ïa ki mashin bad dieng

Shillong, Jylliew 29: Ka ophis jong ka Hollaidonga Range forest office kaba hap hapoh ka West & South-West Garo Hills (Territorial) Division ka la pynpra ïa saw tylli ki kharkhana ot dieng beaiñ ne ki bym ïoh jingbit kiba treikam ha ki thaiñ Chibinang-Bolarbita bad Selsella.
ïa ki jingkhynra la pynlong ha ka 23 bad 29 tarik u Jylliew hadien ka jingtip ba thikna halor ki jingtreikam ba beaiñ jong ki karkhana ot dieng, kaba la wanrah ïa ka jingpynjulor kaba khraw ïa ka mariang ha katei ka thaiñ.ïa lai tylli ki karkhana ot dieng la pynpra noh ha Chibinang-Bolarbita, katba kawei pat ha Selsella.
U DFO (Territorial), West & South-West Garo Hills, u Rupankar K Marak, u la ong ba ki forest team (kynhun khlaw) ki la pynlong ïa ka jingkhynra kynsan ha ki jaka ba la shah ktah, kaba la pynlong ïa ki unit ba beaiñ ban khang noh mardor.Ha ki jingkhynra, ka kynhun ka la lap ïa ki karkhana ot dieng kiba dang shu buh thymmai kiba ïaid hapoh ki phyllaw ba la shna kyrpang bad ki la pynpra ïa ki jingtei jong ki, kynthup ïa ki heavy-duty bandsaw assemblies bad ki tyre kali.
Ka tnad ka la kurup lai tylli ki mashin ot dieng kiba pura ryngkat bad ki tiar ba la pyndap — kawei ka motor elektrik, kawei ka platform, bad kawei ka kali.U Marak u la ong ba ka tnad ka dang lum jingtip na ki tyllong kiba bun shaphang kiwei pat ki karkhana ot dieng kiba la seng beaiñ ha kylleng ka distrik bad kan bteng ban khynra da kaba tyngeh ban tehlakam ïa ki jingpynkheiñ kiba ïadei bad ki dieng.Ka tnad khlaw ka la pynpaw biang ïa ka jingkular jong ka ban ïada ïa ki marpoh khyndew bad ban shim khia da ka aiñ pyrshah ïa kito kiba donkti ha ka jingpom dieng beaiñ bad ki kam ot dieng khlem jingbit.