Pynphuh pynphieng ka Ri Bhoi Christmas Committee ïa ka sor Nongpoh, plie u MLA ïa ka Shyngoid
Nongpoh, Nohprah 17: Kum ba ju leh man la u snem ban pynlong ïa ka jingrakhe Christmas bad snem thymmai kaba phuh ba phieng ha Ri Bhoi District, ka Ri Bhoi Christmas Committee ka la bteng ban pynriam pynbeit ïa ka sor Nongpoh da ki rong ki rup bad da ki bor jingshai ba phyrnai kaba long shi bynta ban rakhe don burom ïa ka Christmas bad snem thymmai.
Na ka liang ka Ri Bhoi Christmas Committee shu ban jam na ka bynta ban pdiang ïa ka Christmas bad snem thymmai, hadienba ka la pynkhreh pynkhrum ban pynitynad ïa ka sor Nongpoh da ki rong ki rup bad ki jingpynriam ba itynnad, ha ka sngi Saitjaiñ ka la plie paidbah noh ïa ka shyngoid ryngkat kitei ki jingpynreim shuwa ban pdiang ïa ka Christmas bad snem thymmai.
Ïa kine ki jingpynriam bad ka Shyngoid Christmas la wan ruh ban plie da u MLA ka Nongpoh Constituency, u Bah Mayral Born Syiem bad ba la sakhi lang ruh da ka jingdon lang u Rangbah Shnong ka Nongpoh, u bah Silverster Mynsong, u Bah Donald Rymbai, President ka Ri Bhoi Christmas Committee, ka Kong Mariam Maring, kawei na ka longkmie ka thaiñ Nongpoh, u Bah Anthony Suchiang, Secretary ka Shnong Nongpoh, ki nongïalam niam bad kynthup kiwei kiwei ki nongïalam niam na ka thaiñ Nongpoh.
Ha kane ka sngi ba la plie paidbah ïa kitei ki jingpynitynad ïa ka sor Nongpoh bad kynthup ïa ka shyngoid la sam ruh ïa ki jaiñ Blanket sha bun tylli ki longïingbaduk kum ka jingai sngewbha, ba la synñiang kylluid mynsiem da ka longïing longsem jong ka Kong Marian Mariang.
Haba kren ha kane ka sngi, u Bah Mayral Born Syiem kum u nongmihkhmat paidbah u la ai khublei kyrpang ïa ka Ri Bhoi Christmas Committee ha ka jingïalam u Bah Donald Rymbai, ba ki la lah ban pynkhreh pynkhrum bad ban pynitynnad ïa ka sor Nongpoh kaba long ka burom jong ka Ri Bhoi bad ruh kaba dei ka khyrdop ban rung sha ka jylla ha kaba kane ka jingpynitynad kan pynphuh pynphieng ïa ka jingrakhe Christmas bad snem thymmai.
Shuh shuh, nalor shibun kiba u kren halor ka jingmut jong ka Christmas bad snem thymmai, u Bah Maral Born Syiem u la ai ruh ïa ka khubor Christmas da kaba ong “To ai ba kane ka christmas kan dei ka jingrakhe kaba kyrpang na ka bynta kito ki ba don hapdeng ka jingduk jing jynjar. U la ong ruh ba ka jingrakhe ïaka Christmas kam dei ban long da kaba lehkmen da kaba bam ba dih kaba ym ïa dei dur ba ka mon ka jong u Blei, hynrei ngi dei ban pynkhreh bha ïalade shimet shimet bad ban kylli ruh kaei kaba nga dei ban leh ha kane ka Christmas bad snem thymmai.