Kynjoh ka Jingïaseng Samla Balang Presbyterian Umyiap sha u maw mer ba hynñiew phew san

Nongstoiñ Nohprah 17: Ka Jingïaseng Samla Balang Presbyterian Umyiap kaba hap ha ka laitkseh Presbytery , Umyiap District ka dei kawei na ki jingïsamla ba la slem tam hapoh ka Presbytery kaba la kynjoh mynta sha ka hynñiewphewsan snem naduh ba la sdang ïa ka Jingiaseng samla ha u snem 1948.
Kumta kum ka dak jong ka jingpynsah jingkymaw ïa ka ka jingïaseng samla ha ryngkat ka jingïatreilang bad ka Balang baroh kawei ka la pynlong ïa ka jingrakhe ba kyrpang kaba la sdang naduh ka lahsngu u Blei kaba la dep da kaba pynlong ïa ki prokram ba bun jait baroh shi taïew bad la pynkut noh mynta ka sngi da kaba pynlong ïa ka jingïaseng ba kyrpang baroh shi sngi ha kaba la pynïaid da ka jingïseng samla.
Nalor kata kum ka dak jong ka jing pynsah jingkynmaw ka jingïaseng samla ka la tei ruh ïa u mot sahjingkynmaw ha phyllaw jong phyllaw jong ka ïng mane bad la plie ïa utei u mot satjingklynmaw da u Tymmenbasan G.J.L.Sangriang uba dei u Moderator jong ka jingïaseng Samla Laitkseh Presbytery.
Ha katei ka jingrakhe ïa katei ka Platinum Jubilli kaba la pynlong ha ka ïngmane jong ka Balang ha ka jingïaseng kaba shiphew shiteng kaba la pynïaid da u Tymmenbasan S.S.Kharbani.
La pynphuh pynphieng ïa ka jingïaseng da ka jingrwai jong ka jingïasengkhynnah jong ka Balang bad ka jingïasyllok na ka ktein ka jong u Blei da u Tymmenbasan G.J.L Sangriang. Utei u Tymmebasan ha ka jingïasyllok jong u u la sneng nongrim na ka Kitab Deutoronomi 3: 27 kaba ong “ To leit kiew me shya kliar u lum Piskah, bad to khmied ïala ki khmat shaphang sepngi, bad shaphang shatei, bad shaphang shathie , bad shaphang mihngi.” Kat kum katei ka nongrim ba u la buh u Tymmenbasan u la kren ha kaba ïadei bad ka jingïalam jong u Blei ïa u Moses naduh ka khyllipmat ba u Syiem Pharoa ka Egypt u la pyllait mraw ïa ki bad ka jingïaid lynti jong ki lyngba ka duriaw basaw , ka rikhlaw Sindh. Haduh ba kin da poi ha trai u lum Hermon ka jaka ïa kaba u Blei u la kren ha u Moses ba un leit kiew sha kliar jong u Lum Piskah.
Ha kajuh ka por u Tymmenbasan u la ringdur ïa ka jingïaid lynti jong ka Jingïaseng Samla ha ki hynñiewphewsan tylli ki snem ba ka jingïaid lynti kam dei satia kaba suk hynrei ki nongïalam jong ka Jingïaseng Samla ki la ïakynduh shibun ki jingeh. U la kyntu ruh ïa ki nongïalam jong ka Jingïaseng Samla ba haba ki long kum ki nongïalam kim dei ban shanniah tang ha ka bor jong ka jingstad briew hynrei kaba kongsan eh ka long ban shanniah ha u Blei khnang ba ki lah ban ïalam ïa ka Jingïaseng Samla kumba u Moses u ïalam ïa ka kynhun jong ki khun Israel na ri Egypt.
Ha ka jingïaseng kaba ar kaba la sdang ha ka por shibaje shiteng nohphai sngi kaba la pynïaid da u samla Blestingwell Wahlang la pynshit pynshngaiñ bad pynphuh pynphieng da ki jingrwai ïarph ki jingpule na ka ktien jpong u Blei bad ka jingrwai Choir da ki dkhot jong ka Jingïaseng Samla bad ki jingrwai kyrpang kaba la pynkyndeh bad pynlung mynsiem ïa ki pait riew ngeit jong ka Balang.
Nalor kata ha katei ka jingïaseng arsien la ïoh ïa ka jingïasyllok na ka ktien jong u Blei da u Prop Pastor K.Dkhar.U Pro Pastor ha ka jingkren jong u u la seng nongrim na ka ktien jong u Blei na ka Kitab u Daniel 6: 16 ki ktien kiba ong “Ynda kumta u Syiem u la hukum, bad ki la wallam ïa u Daniel , bad ki la bret noh ïa u hapoh ka krem ki sing .Te u Syiem u la kren bad u la ong ha u Daniel, U Blei jong me ïa uba me shakri khlem da pud , un pynim ïame”.
U Pro Pastor haba kren halor katei ka dkhot na ka ktein ka jong u Blei u la ringdur ïa ka jinglong jong u Daniel kum u samla uba im hok bad shakri hok ïa ka kam wat hapdeng jong ki ba bun ki jingeh kiba u ïakynduh.Nalor kata haba kren halor katei ka dkhot bad ki jingshisha u Pro Pastor u la pynsngew ba u Daniel u long ka nuksa kaba shai kdar ba kum ki samla Khristan ngindei ban bud.
U la ong ruh ba hapdeng jongkane ka juk jong ki jingkylla ba har rukom kiba pynbyrngia bad kiba pynshetieng ruh ïa ki Khristan ka jingshanniah bad ka jingaiti lut ha u Blei ka donkam haduh katta katta.Ha kaba pynkut ïa katei ka jingrakhe la pynlong ïa ka jingïaseng miet kaba sdang ha ka por 6.30 p.m ha kaba ki smala ki la ïashim bynta shitrhem ha ka jingïaseng bad la pynkut ruh da kaba u Pastor ,K.K.Kharsyniew u la pynhap ïa ka lama bad la pynlong ruh ïa katei ka jingpynkut da ka “Janmiet ki sur jingrwai ïaroh”