Pynlong Career Guidance & Counselling Programme ka Rotary Club Jowai ha JNV School, Mukhla

Jowai, Nohprah 17: Ka Rotary Club Jowai ha ryngkat ka jingïatreilang bad ka JNV School Mukhla ha kane ka 16 tarik u Nohprah kila pynlong ïaka Career Guidance & Counselling Programme ha kaba u Sylvester Phanbuh, MCS-EAC, West Jaiñtia Hills ula long kum u kongsan.
Ïa ka jingïalang la pynïaid da u Rtn. Deibormi Toi, President Rotary Club, Jowai haka jingdonlang ka Rtn. Ester F Gatphoh, Chartered President Rotary Club Jowai, Rtn. P.Najiar, kong Vandya Srivastava, Vice-Principal, JNV Mukhla, Rtn. Montri Passah, Rtn. Samehi Laloo, u Rtn. Reuveny Nongtdu, ki khynnah skul bad ki nonghikai ka JNV School Mukhla.
U Rtn. S.K. Lato, Vice-President RC, Jowai haka jingkren ula pynsngew hapdeng ki khynnah skul shaphang ka Rotary International kaba dei kawei na ki seng treimon sngerwbha, kaba don ha kylleng ka ri jong ka pyrthei, ula batai kumjuh shaphang ki kam ba bha kiba kane ka seng kala trei na ka bynta ka imlang ka sahlang hapoh ki shnong.
U Sylvester Phanbuh haba ai jingkren kum u kongsan ula buh ka jingkyntu kumno ban pynlong ïa ka Ri India kam kawei na ki Ri kaba kiew bha shakhmat ha ki liang baroh. Da kaba ong kum ki nongïalam ba hakhmat donkam ban ïoh ïa ki briew kiba shemphang ha ki kam bapher bapher.
Shuh shuh ula ong ki khynnah skul ha kine ki sngi ba mynta ki long kiba donbok namar ki jingstad kiba lah ban ïoh mynta ym dei kum ha kipor ba mynshwa ba dang duna ka jingstad, kumta u kyntu ba kin pyndonkam hok ïa kane ka juk jingstad ba mynta ha ka lynti kaba bha.
Ha kane ka Career Guidance & Counselling Programme lawan ban ai jinghikai bniah shuh shuh ïa ki khynnah skul da ki riew shemphang ba kynthup ïa ka Dr. Rica Lamar kaba la batai shaphang ban ïoh ïaka jingkoit jingkhiah. Katba ka Eva Thabah bad ka Badonnam Pyrbot kila hikai kumno ban wad ki lad ki lynti hadien ba kila pyndep ïa ki jingpule ha ki kyrdan bapher bapher.