Nongpoh, Nohprah, 17: Ka Seng Samla Katholik Nongpoh Parish ha ka sngi u Blei ka la pynhap pyrda ïa ka jingïakynduh lang jong ki khun samla ne ka Annual Youth Convention kaba 17 kaba la sdang naduh ka sngi Thohdieng jong ka taïew baladep.
Ha kane ka sngi, la sakhi lang da u MP ka Shillong u Bah Vincent H. Pala, u MLA jong ka Nongpoh Constituency Bah Mayral Born Syiem, u MDC ka Nongpoh Bah Balajied Rani, u Bah Sunshine Makri, Fr. Peter Syiemlieh Parish Priest ka Nongpoh Parish, Fr. Devasia Vazhayil SDB lem bad ki Sister bad Phadar ryngkat ki paidriewngeit ka Nongpoh Parish lem bad kiwei kiwei kiba la shah khot sngewbha.
Ha kane ka lympung ïa kynduh lang jong ki samla ba la ïashim bynta naduh ki samla shynrang bad kynthei na kylleng ki Balang Shnong kiba hap hapoh ka jylli jong ka Nongpoh Parish, ki la ïohlad ban ïa phylliew jingmut bad ban ïakren halor kiba bun ki mat kumno ban dang pynkhlaiñ ïa ki khun samla ym tang na ka bynta ka lawei jong ka Balang bad ha ka imlang ka sahlang.
Haba ai jingkren ha kane ka sngi, u MLA bad u MDC ka Nongpoh lem bad kiwei kiwei ki nongkren kynthup lang ki Phadar, ki la pynpaw ïa ka jingkmen ban ïadon bynta ha kane ka lympung ïakynduh lang ki khun samla bad ki la ai mynsiem ruh ïa ki khun samla ba kum kine ki jingïakunduh lang ka long kaba donkam eh hapdeng ki khun samla khnang ba kin ïoh ban ïakren ne ïathir ïa kiba bun ki bynta kumno ban pynkhlaiñ ïa ki khun samla ha ka kam ka jong u Blei bad kumjuh ruh na ka bynta ka imlang ka sahlang.
Nalor ki jingkren kiba dei shaphang ka kam ka jong u Blei, ha kane ka sngi la mih ruh ka sur jong ki samla ban rat dyngkhong ïa ka jingkynrei jong u drok uba la pynjot ïa kiba bun ki khun samla ba luilui jong ka imlang ka sahlang bad ban pynduhjait ïa kine ki kam sniew bad khamtam ïa u drok la donkam ban don ka jingïatrei lang naduh ka Balang, ki shnong ki thaw, ki longkmie ki longkpa bad baroh kiba don ka jingkitkhlieh ban ïada ïa ki khun samla ban lait na ka tyrsim jingpynjot jong u drok.
