Khliehriat Nailur 11: Ka ophis jong u District Mental Health Programme (DMHP), East Jaiñtia Hills District ha ryngkat ka jingiatreilang bad ka District Legal Services Authority (DLSA), East Jaiñtia Hills District, mynta ka sngi ka la pynlong ïa ka prokram “World Suicide Prevention Day 2026′ ïa ka prokram la pynlong ha Rymbai Government Higher Secondary School, kane ka dei ka prokram ban ïada ban lait na ka jingpyniap ïalade ba ki ju ong ka suicide bad ka don ka phang pdeng “Changing the Narrative on Suicide,”
Ka thong jong kane ka prokram ka long ban pynduh pyndam ïa ka jingpeit beiñ ïa kiwei, ban ai mynsiem bad don ka jingiakren kaba laitluid bad ban pysaphriang ïa ki jingai jingpynshai halor kumno ban pynkhlain ïa ka bor jingmut jingpyrkhat bad ban ioh ïa ki jingkyrshan lyngba ka aiñ.
U District Malaria Officer, East Jaiñtia Hills District, Dr. C. S. Bareh, haba kren ha ka jingialang u la kren halor ka jingdonkam ban tuklar biang por ïa kano kano ka mat kaba ktah ïa ka jingmut jingpyrkhat, da kaba khmih bniah lyngba ki dak ki shin ban ai kloi ïa ki jingkyrshan ban tei bad ban pynkylla ïa ka rukom pyrkhat.
Ka Deputy Legal Aid Defence Counsel, East Jaiñtia Hills District, ka kong K. Challam ka la kren halor ki aiñ kiba lah ban iarap bad ban hikai ïa ki paidbah lyngba ka District Legal Services Authority (DLSA), East Jaiñtia Hills District.
Ha kane ka prokram ka la don ruh ka jingiakop dro dur bad jingthoh slogan kaba halor ka phang pdeng “Changing the Narrative on Suicide,” ha kaba ki khynnah skul ki la ïashimbynta bad la sam ïa ki prize sha kiba jop ha kane ka jingiakop.
La don ruh ka jingshim ïa ki kyntien jingkular ha kaba ïadei bad ka bynta ban kyntiew ïa ki jingpynsaphriang khubor bad ai jingkyrshan solaonsar khamtam ïa kito kiba don ka jingtlot ha ka jingmut jingpyrkhat.
Kiba la ïa don lang ha kane ka prokram ki kynthup , ka Psychiatric Social Worker, District Mental Health Programme(DMHP), East Jaiñtia Hills District, ka kong Thaiwan Kyndiah, ka Assistant Case Registry, District Mental Health Programme (DMHP), East Jaiñtia Hills District, ka kong Ibanri Myria.
