Nongpoh, Lber 13: Ha ka lyngkhuh sngi kha u Albert Einstein bad ka lyngkhuh sngi ïap u Stephen Hawking, ka University of Science and Technology (USTM) lyngba ka Tnat Pule Physics mynta ka sngi ka la pynlong da ka Brainpower Battle 2.0 b ad ka IQ Test ba la shim bynta da ki samla pule katei ka skulbah.
Kane ka jingïakop ka la sdang da ka jingai jingkren u Dr. Nitu Borgohain, u Assistant Professor bad u Head Department ka tnad Physics ka USTM, u Dr. Borgohain, uba la ban khia halor ka phang ka jingkordor ka jingnang jingstad bad la rakhe burom ruh ïa ki synñiang ki bynhei u Einstein bad Hawking kum kita ki riewkhraw pyrkhat ka pyrthei.
Kane ka jingïakop ba la tip kum ka Brainpower Battle 2.0 bad ka IQ test, ka dei shi bynta ban twad jingmut halor ki bor jabieng ne ki bor pyrkhat ki khynnah pule bad haduh katno ki don kata ka jingstad bad ka jingshemphang.
Ki samla pule kiba la shim bynta ha kane ka jingïakop, ki la pynpaw ïa ka jingsngewkmen ban ioh ïa shim bynta ha kum kine ki jingïakop ban phrang ïa ki jingstad jong ki khynnah bad kane kan ïarap shibun eh ïa ki samla pule ba kin dang pyntbit ha ki jingstad bapher bapher ba ki don kum kita ki samla pule ha ki bor pyrkhat jong ka jabieng.
Lyngba jong kane ka sngi, ki 3 ngut ki nongïashim bynta ki la ioh pdiang ïa ki khusnam, kaba long kum ka jingai mynsiem halor ka jinglah jongki ban pynpaw ïa ka jingstad ha katei ka jingïakop jong ka bor jabien ne ki bor pyrkhat pyrdaiñ.
