Pynlong ka USTM bad ka ISSA da ka jinghikai halor ka roi ka par ki jylla shatei Lam Mihngi ka ri India

By Mawphor News Desk On Jan 7, 2024

Nongpoh, Kyllalyngkot 06: Kawei na ka shlem ai jinghikai ka University of Science and Technology (USTM), Meghlayaa ba la tip kum ka ‘Centre for Gender Studies’ mynta ka sngi ka la pynlong da ka prokram ai jinghikai ba la tip kum ka National Seminar, “Social Science Research, Institution and Development” kaba dei shaphang ka roi ka par jong ki jylla shatei lam Mihngi ka ri India.
Kane ka prorkam ka dei kaba ai jinghikai kyrpang shaphang ka jinglong jingman ha ka imlang ka sahlang bad kumjuh ruh shaphang ka roi ka par jong ki jylla ba hap ha ki bynta Shatei Lam Mihngi ka ri India, haka ba ïa kane ka prokram la ïa trei ryngkat da ka Indian Social Science Academy bad la kyrshan ruh da ka Indian Council of Social Science Research (NERC).
Ki riew shemphang kiba la wan ban ai jinghikai bad ban kren ha kane ka prokram ai jinghikai ki kynthup naduh u Prof. Sambit Mallick na IIT Guwahati, Prof. Rana Pratap Singh na ka School of Environmental Sciences ka Babasaheb Bhimrao Ambedkar University, bad Dr. Sabrina Iqbal Sircar na Pragjyotish College, Guwahati bad na kiwei kiwei ki University.
Ha kane ka prokram, ka Dr. Sabrina Iqbal Sircar ka la kren shaphang ka rukom long ka rukom man ha ka long kynthei shynrang bad ka la ban khia ruh ba ka dei ban long lang kumjuh la ki dei ki kynthei ne ki shynrang bad khamtam ki shynrang ki hap ban burom ïa ki kynthei.
Ka la kren ruh shaphang ka jingsdang ne kata ka jinglong jingman kata ka long kynthei ka long shynrang kumba la pule bniah shaphang ka long kynthei ka long shynrang (Gender studies), haduh ban da long pura ka long briew la ki dei ki kynthei ne ki shynrang.
U Prof. G.D. Sharma, Chancellor ka USTM, bad u Dr. RK Sharma, Advisor ka USTM ki la ai jingkren ha kane ka prokram ai jinghikai bad ki la ban khia ruh halor ka jingkordor ka long kynthei ka long shynrang ba ki dei ban long lang kajuh ha ka imlang ka sahlang khlem da don ka jingnoh shilaing ha ka long briew ka man briew. Haduh 24 tylli ki Research Paper kiba dei ki Ph.D Scholar ki la aiti ha kane ka sngi na ka bynta ban wad bniah halor ka rukom long ka rukom man jong ki jylla shatei lam mihngi ka ri India.