Jowai, Kyllalyngkot 06: Ïa ki Final Electoral Rolls jong ki saw tylli ki Assembly Constituencies kata ka 1-Nartiang (ST), 2-Jowai (ST), 3-Raliang (ST) bad ka 4-Mowkaiaw (ST) la pyllait paidbah hynnin ka sngi sha ki nongmih khmat jong ki kynhun seng saiñ hima sima da u bah B.S Sohliya, IAS, District Election Officer, West Jaiñtia Hills ha Conference Room, DC office, Jowai.
Ha katei ka sngi la donlang naduh ka Additional Deputy Commissioner (Election) kong B. Blah, ADC Smt. D V Lyngdoh bad ka ADC Smt. HML Kynta.
Na ka liang u bah B.S Sohliya Deputy Commissioner ula pyntip ïa kine ki Final Electoral Roll jong ki saw tylli ki Constituencies la pyllait katkum ka jinglum jingkheiñ hapoh ka 01.01.2024 lyngba ka Registration of Electors Rules, 1960 bad ha ka juh ka por kino kino kiba kwah ban jurip bniah ki lah ban leit mih sha ka ophis u Deputy Commissioner (Election Branch) bad sha ki Polling Station ha ki por ba long trei.
Ha kaba ïadei bad ka rukom pyndonkam ïa ki EVMs ka kong B. Blah, ADC, ERO kala pyntip ba ki paidbah ki lah ban wan mih sha ka ophis khnang ban ïoh jinghikai ba kham bniah halor kine ki EVMs (Electronic Voting Machines) bad VVPAT. Kala ong ruh kan don ka Demonstration Van ka ban leit ai jinghikai shaphang kine ki mashin.
La pynsngew ba ki Constituency kiba don ïa ki nongthep vote ki long kumne na ka 1- Nartiang (ST) baroh ki don 45,375 voters na kine 22,328 ki shynrang bad 23,047 ki kynthei. Ha ka 2- Jowai (ST) ki don 41,345 na kine 19,464 ki shynrang bad 21,881 ki kynthei. Na ka 3- Raliang (ST) ki don 40,019 na kine 19,001 ki shynrang bad 21,018 ki kynthei, katba na ka 4- Mowkaiaw (ST) ki don 39,669 ngut na kine 19,624 ki shynrang bad 20,045 ki kynthei..
Na ka bynta ki Polling Stations ha ka 1-Nartiang ki don 63 tylli ki Polling Stations, 2-Jowai 57 tylli ki Polling Stations katba ha 3- Raliang bad 4- Mowkaiaw ki don mar 55 ki Polling Stations.
