Rakhe dap 3 snem ka RBYF 3 shnong Unit, da ki jaiñkup syaid ai sngewbha sha ki longiing ba duk

Nongpoh, Kyllalyngkot 06: Ka Ri-Bhoi Youth Federation 3 shnong Unit ha Ri-Bhoi mynta ka sngi kala rakhe ïaka jingdap 3 snem ka jingïaid lynti jong katei ka Unit naduh bala suid la shor ïaka ha u snem 2021, bad la ioh ruh ban pynskhem syndon ïaki nongkitkam ba thymmai jong ka seng ban bteng ïaka jingshakri haka imlang ka sahlang.
Ha katei ka sngi ka jingrakhe dap 3 snem katei ka Unit la wan ruh ban sakhi da ka jingdonlang u Bah Bipul Thangkhiew President ba rangbah ka RBYF Sengkmie, Bah Denis Syngkli Organising Secretary, Bah Bawan Marweiñ Sports Secretary, Bah RJ Thangkhiew Political Secretary, Samla Alberto Nongsiej President Nongpoh Circle, Samla Wanpyndapskhem Mawlieh bad kiwei kiwei ki riew rangbah ryngkat ki nongïalam ba thymmai jong ka RBYF 3 shnong Unit bala pynskhem syndon ha katei ka sngi da u President ba rangbah.
Naka liang ka RBYF 3 Shnong Unit ha katei ka sngi kala ioh ruh ban sam da ki jaiñkup syaid sha ki longiing ba duk jong ki 3 tylli ki shnong ba kynthup ïaka Umlyngkdait, Umryngksai bad Umshangling kum ka jingai sngewbha snem thymmai ba u snem thymmai un long u snem uba pahuh pahai ryngkat ka met ba koit ba khiah.
Haba kren ha katei ka sngi naka liang u Bah Bipul Thangkhiew kum u President ba rangbah u la pynpaw ka jingsngewkmen kaba khraw ban iohi ba katei ka Unit ka roi bad ka kiew da ka jingtrei shitom jong ki nongïalam ban ai ka jingshakri ha katei ka thaiñ khamtam ban leh ki kam ba bha ban kyntiew ïaka imlang ka sahlang.
U la kyntu ruh ïaki nongïalam ba thymmai katei ka Unit ha katei ka sngi ba kin bteng ïaka jingtreikam da ka mynsiem ba shitrhem, khamtam ban long ki dkhot kiba ïatylli haka rukom treikam ba kano kano ka kam kaba ki trei kan long kaba seisoh khamtam ban kyntiew ïaka dong ka thaiñ bad ka ri bad ka jaitbynriew hi baroh kawei.