Pynlong jingïalang ka JSM ha Khliehriat ban dawa National Law School University

Khliehriat Risaw 23: Ka Jaiñtia Students Movement, ha ryngkat ka jingïatreilang bad ka National Law School University Demand Committee, hynnin ka sngi ka la pynlong ïa ka jingïalang kaba kyrpang ha Jaiñtia Eastern College Khliehriat ban pynshai paidbah halor ka jingdawa ban don noh ka skul bah ne ka University ha ri lum Jaiñtia kaba na ka bynta ki khynnah kiba pule ïa ka aiñ ne ka Law, la ong ruh ba na ka liang ka Committee ka la ka la dep ban ïa kynduh ïa ki bor sorkar ba dei peit ïa ka tnat pule puthi bad kumjuh ruh kin sa leit aiti ïa kane ka jingiadawa ka jong ki sa sha u Lat ka Jylla.
La ong ba ha ka jingshisha, ka jingthmu jong ka sorkar pdeng ka long ban buh noh ïa ka skul bah, ka National Law School University ha man la kawei pa kawei ka jylla, kumta hapoh Ri Lum Jaiñtia ki la thaw ïa kawei ka Committee kaba la tip kum ka National Law School University Demand Committee, kaba la lam khmat da ka Society for Study of Law,
Haba kren ha ka jingïalang, u Principal jong ka Jaiñtia Eastern College Khliehriat, u Dr. P. Nongtdu, u la ong bad pynpaw ba ka ri Jaiñtia ka long shi sha kaba la shah ibeiñ haduh katta katta haba ïanujor bad kiwei ki District ha kaba ïadei bad ka jingioh ïa ki jingdonkam jong ki paidbah khamtam ha kaba ïadei bad ki shlem ai jingnang jingstad lane ki jaka pule puthi, ka ri Jaiñtia ka long shi sha kaba la shah ibeiñ haduh katta katta, u la ong ruh ba ka Ri lum Jaintia ka dei jaka kaba riewspah bha ha ka jingdon ki marpoh khyndew bad kumjuh ruh ha kiei kiei kiba don ha ka mariang hynrei ki briew pat ki long kiba duk kiba kup shiliang sem shiliang, kumta u la ong ba lada ka sorkar kan buh ïa ia kane ka jaka pule Law hapoh ka r ilum Jaiñtia kan ai jingmyntoi shibun ïa ki samla pule jong kane ka thaiñ, namar kum kine ki jaka pule jong ka sorkar ki long kiba duna ka jingsiew kumta kan ïarap shibun ban pynioh lad ïa kito ki ba duna ha ka ïoh ka kot ba kin lah ban leit pule ha kum kine ki jaka pule jong ka sorkar.
U General Secretary jong ka Federation of Khasi Jaiñtia and Garo people East Jaiñtia Hills District, u samla Deihok Sumer, u la ai ka jingiaroh ïa ka Society for Study of Law (SFSL), kaba la shim ïa kane ka synjam ban dawa na ka sorkar jong ka jylla Meghalaya ban buh ne wanrah ïa kane ka jaka pule hapoh ri lum Jaiñtia, u la ai ruh ka jingiarok ïa ka Jaiñtia Students Movement, East Jaiñtia kaba la khot ban pynlong ïa kane ka jingïalang hapoh kane ka District East Jaiñtia Hills District bad ruh kaba la don ka thong ban ïaid sha khmat haduh ban da ïoh ïa kane ka jingdawa kaba donkam ka ban long ka jingmyntoi ïa ki khun samla ka thaiñ.
Na ka liang u bah Damewanhi Rymbai, uba la khot bad kyntu jur ïa baroh ki hynñiew ngut ki MLA na ri lum Jaiñtia bad ïa ki 30 ngut ki MDC jong ka ri lum Jaiñtia ban kin mih sha khmat ha ka ban snoh kti lang ha kane ka jing dawa kaba donkam tam na ka bynta ki lawei jong ki ri lum Jaiñtia, namar da ka jingdon ryngkat jong ki kum ki nongmihkhmat kan kham ai bor shuh shuh halor kane ka jingdawa.
Kiba la ai jingkren ki kynthup ruh u bah S.Ryngkhlem, uba dei u wei na ki nongïalam jong ka Khasi Students Union East Jaiñtia Hills District Unit, u Secretary jong ka Jaiñtia Students Movement, u samla Roitre Dkhar, u President jong ka Khliehriat Bar Association, u bah K.Ksoo, kiba la ïa don ryngkat ha kane ka jingïalang ki kynthup ruh ki dkhot bad nongïalam jong ka Jaiñtia Youth Federation, ki dkhot bad nongïalam jong ka Synjuk ki Waheh Shnong East Jaiñtia Hills, ki dkhot bad nongialam jong ka Society for Study of Law.