Jowai, Risaw 23: Ki Khasi, ki Pnar, ki Bhoi, ki War. Ki Dko, ki Lyngngam wat lada ki wan na ka juh ka thymei, hynrei pat ka ïapher ka ktien ka thylliej kawei ka thaiñ na kawei ka thaiñ.
Ha kane ka jingïapher ha ka ktein ka thylliej, ha Ri-Lum Jaiñtia la don ka jingpyrshang ban thoh ïa ka ktein Jaiñtia naduh ka snem 1900, ha kaba ïa ka riti treikam bad ïa ka rai ka Jaiñtia Dorbar la thoh ha ka ktien Jaiñtia, hynrei pat ym don shuh ban buddien bad ban thoh ha ka ktien Jaiñtia ba kan neh ha ki thiar buh kot.
Kham hadien ban pynneh pynsah bad ban don ka thoh ka tar ha ka ktien Jaiñtia, la mih katto katne ki Rangbah kum u ma (L) Albin Pariat, ma (L) Kistobin Rymbai bad kiwei kiba la pynim biang ban thoh bad pynmih kot ha ka dur jong ka poetry lane ka jingpynkylla ktien na ka ktien Khasi sha ka Jaiñtia bad kane ka jingpyrshang kala shu kut noh hadien bala khlad kine ki Rangbah.
Kane ka jingpyrshang ban thoh bad pynmih kot ha ka ktien Jaiñtia wat lada kam don ha ka thoh ka tar, hynrei pat ka paw ka ktien Jaiñtia lyngba ka jingai khubor da ka All India Radio, Shillong ban pynneh pynsah ïa ka ktien Jaiñtia ha ka thoh ka tar, mih sa ki rangbah kum u ma (L) Dr. Barrister Pakem, ma Philo M Passah, kong Phidalia Toi bad kiwei de bad kane ka jingpyrshang tang shu khlad noh u Dr. Barrister Pakem kala shu jah la ka jah kumto.
Ha kane ka kynti hapoh ka jingïalam u Dr. Henry Lamin la pynlong bunsien ïa ki jingïalang jong kane ka seng ban jied ïa ki dak thoh, kiba donkam ha ka thoh ktien Jaiñtia bad hynnin ka sngi saitjaiñ jong ka 22 tarik u Risaw, 2022 ha ka jingïalang kaba la long ha NEHU New Guest House, Shillong hadien ba la ïa phylliew jingmut bad ka jingai jingmut na u Chairman Dr. Henry Lamin, Dr. P.M. Passah, Dr. Silvanus Lamare, ma M.M. Thaiang, ma O. Kyndiah bad kiwei de kila pdiang ïa ki 24 tylli ki Alphabet ban thong ktien Jaiñtia kiba long kumne (A-B-C-K-D-E-NG-H-I-Ï-J-L-M-N-Ñ-O-OO-P-R-S-T-U-W-Y) nalor ki Alphabet kiba la mynjur da ka Jaiñtia Hills Autonomous District Council bad ym slem shuh yn sa mih ki kot pule ha ka ktien Jaiñtia.
