Shillong, Ïaïong 19 : Ka lympung ïalehkai phutbol jong ki Under-10 (Boys) Football League 2023 ba pynïaid da ka Shillong Sports Association (SSA) ha ka sngi Balang ka la long hapdeng ka Kynton U Mon pyrshah ïa ka Nangkiew Irat SC.
Ha kane ka jingïalehkai, ka kynhun jong ki heprit Kynton U Mon ki la lah ban khur jingjop da kaba pynleim da 5-0 kol ïa ka kynhun ïalehkai jong ki heprit ka Nangkiew Irat.
Ha ka jingïalehkai hapdeng kine ki ar tylli ki team ha madan Second Ground, Polo, Shillong, ka jingïalehkai ka long kaba shongshit bha, ha kaba baroh arliang ki la ïakhun tyngeh ban ïoh thep kol.
Hapdeng ka jingïakhun kaba itynnad bha, ka Kynton U Mon ka la ïoh ban plie pyrda ïa ka shi kol ha ka jingïalehkai kaba la ïaid 12 minit lyngba u N. Bareh. Une u khynnah ïalehkai u la pyni shisha ïa ka sap ïalehkai kaba tbit ha kaba u la ïoh ban thep haduh saw kol marwei.
Ïa ka kol kaba ar u la ïoh ban thep ha ka minit kaba 33 shuwa ba u A. Nongspung u thep ïa ka kol kaba lai. U N. Bareh u la thep ïa ka kol kaba saw na ka bynta ka kynhun ha ka minit kaba 43 shuwa ba un thep ïa ka kol kaba san ha ka minit kaba 48 ha kaba ka kynhun ka la ïoh ban pynliem noh da 5-0 kol.
Ka jingïalehkai mynta ka sngi Palei jong katei ka lympung kan long hapdeng ka Sacred Heart FT Academy pyrshah ïa ka Umphyrnai SC ha ka por 4:15 baje janmiet.
