Pynkylla khongpong pynban ka jingstad briew ïa ka ri bad ka jaitbynriew jong ngi

Ha kane ka pateng bynriew mynta, ka jingstad u briew ka la long sha ba palat liam bad imat ka la poi haduh kaba kut syndon. Shisien ba ka jingstad ka la poi haba kut, nangne sha khmat pat kan sa sdang sa ban hiar noh. Kan shim por da ki pateng briew ba kan sdang biang ban kiew tangba da kawei pat ka dur. Kane ka juk mynta, ym dei shuh ban kheiñ kai ne khein sting. La mih ki jingstad ki jait pa ki jait ha la ki jong ki jong ki tnad jingstad bapher bapher kiba ym don ba lah sngewthuh shuh pynban ban pynshong dor kano kaba dei bad kano pat kaba lait. Baroh ki pynksan beit tang ïa la ki jong ki jong ki nia la jong. Kaba ong ma ki, kaba dei suda, hynrei, kaba ong pat kiwei, kaba lait bad kaba bakla suda. Namar ba bun eh kiba la nang la stad mynta, ki mih pynban ruh bun ki jingbatai stad ban pynksan ïa lade da lade la kum kita ki matlah Hindustan hyndai kiba la pynksan bad batai stad shaphang u hati.
Shisien ba la sngew stad palat, barabor, ka ju poi pynban shaba lait ne shaba bakla pynban. Tip shuh, shaei kane ka juk kan poi nangne shakhmat?
Ha kane ka MLA eleshon 2023 ruh, imat,ym lah shuh ban batai ne kheiñ jingkheiñ namar ki briew ki la stad bad sian palat mynta. Mynta, imat, la kham stad pynban u nongsngap ban ïa u nongkren. Lada phah kren ïa u nongkren, un kren pynban kat shaba lap ba shem. Kan long pynban kaba ma ba ïoh sngewlehraiñ bad sngew synei pynban ki nongsngap ïa u nongkren bapli. Husiar! namarkata, haba phi phah kren paidbah mynta. Ha ka jingshisha, mynta ki por ym da donkam than ban ïa kanbas elekshon kum ha ki por mynshwa.
Katno eh ki paidbah kin sngap ïa ka jingleit kanbas elekshon jong ki nongïalam ki party bapher bapher haba ki jingtip bad jingpynsngewthuh ki la poi bad ïohi hi ha manla ki khmat bad ki shkor jong uwei pa uwei ne kawei pa kawei ka briew lyngba kita ki lad pynphriang khubor paidbah (social media) lyngba ki Mobile Phone bad Internet bapher bapher. Lada bakla tiak, ka result eleshon 2023 ruh kan mih pynban sha bym poi pyrkhat.
Ka bor bad ka jingstad bad ka mon u paidbah mynta ym lah satia ban shu khein sting ne kheiñkai. Ban pyni ba ki la stad shisha, ki briew jong kane ka juk, ki ladei shisha keiñ ban pynpaw pyrthei ban pynkylla khongpong noh syndon hadien ka MLA elekshon 2023.
Teng teng, ka jingstad palat ki briew mynta ka la pynlamwir pynban ïa kane ka pyrthei. Ki kren bad leh kat ha la ka mon la jong khlem da pyrkhat shuh ïa ka burom ka ijot jong kiwei pat. Tang ba la bit la biang ïa lade, kata, la biang ka jingim bad jingmut jong ki.
Ka jingstad palat ka la pynlong ïa ki briew ba kin sngew heh sngew stad ïa lade ban ïaid bad leh katba ki kwah. Ki nang mut ba kaei kaba ki leh ne pyrkhat ma ki, ka biang beit, hynrei kam long satia kumta. Kane ka lah ban wanrah pynban ka jingma ym tang ïa ka iing ka sem jong ki hynrei ïa ka imlang sahlang baroh kawei bad khamtam eh ïa ki hi shi met shi met.
Kynmaw ba ka pyrthei bad ka juk hi ka ïai kylla manla ka teng, kam dei satia ba ka ïai neh hajuh. Lada leh suk palat kum ki khun samla kane ka juk ruh,’ Don ka ma haba la than eh ka suk’. Lada ai mon ne ki ïoh mon palat ruh, ‘Ki khun ïohmon kim ju long ei ei’.
Lada ki la nang la stad ruh,ym tang ba ki kheiñ beiñ bad kim salia shuh ha iing ha sem bad ïa kiwei de, hynrei ‘katba nangkiew ha ka kyrdan pule,katta, ka nanghiar pynban ha ka akor ka burom jong ki’.
Ha kane ka juk, ‘kiba leh hok kin poi sha kyndong’, katba ‘kiba leh pap pat, baroh baroh kin burom bad pynkiew skong ïa ki.’ Ka pyrthei stad aiu kaba kum kane? Ka ri bad ka jaitbynriew jong ngi ka la liat bad ngop pynban ha kum kane ka apot, ‘ban shong ruh jhieh,la ieng ruh kynduh’.