Shillong, K’lyngkot 05: Ki 7 ngut ki nonghikai kontrak kiba la shah weng kam ha ka sorkar jylla ha u snem 2020 bad kiba la leit tied jingkhang ruh sha ka ïing bishar Meghalaya High Court ba ka sorkar kan thung kam biang ïa ki ha ka sngi Palei ki la ai por 2 taiew ïa ka sorkar ban thungkam biang ïa ki kat kum ka hukum kaba ka ïing bishar ka la pynmih lym kumta kin mih madan ban ïakhun na bynta ka hok jong ki.
Kine ki nonghikai kiba la ïoh jingpynksan ban shah thung pura kum ki nonghikai sorkar ka dei ba ki la ujor moktduma halor ka jingshah weng namar kim pat pyndep ïa MTET hynrei hadien ba ki la pyndep ïa ka MTET kaba ka kashari ka la hukum ban thungkam biang ïa ki.
“Ka jingleit tied jingkhang sha ka HC ka dei shuwa ba ngin thoh ïa ka MTET halor a jingshuh beh kam syndet ïa ki nonghikai kontrak baroh bad katba ka jingbishar ka dang ïaid ka sorkar ruh ka la pynlong ïa ka MTET ha ka sien kaba ar, bad ngi la ïakhun ïa kane ka eksamin, ha kane ka jingïakhun ngi ki 7 ngut ngi la pass bad ynda ngi la pass katba ka ïing bishar kam pat dep bishar ngi la ai jingtip ïa ka High Court ha ka jingshong bishar biang ïa kane mokotduma bad dei ynda ka la poi sha kaba kut ka kashari ka la pynmih ïa ka hukum ha ka 28 Risaw 2022 ba ngi ki 7 ngut kiba la pas ia ka MTET ngi dei ban shah thung kam biang namar ngi la pyndep lut ïa ki jingdonkam ban shah thungkam pura,” la ïathuh ka Kong Phikirbha Khariah kawei napdeng kitei ki nonghikai ha ka jingïakren bad ki nongthoh khubor.
“Hadien ba ngi la ïoh ïa ka jubab na ka High Court ka thoh shai kdar ba ngi la long kiba bit kiba biang ban ïoh ïa ka post kaba ngi trei, hynrei mynta lah ar bnai tam eiei ngi la ïai ap hynrei ym don dak eiei ban thungkam biang ïa ngi” ka la bynrap.
Haba la kylli la ka sorkar kam sngap ïa kaei kaba ki dawa kaei ka sienjam kaba kin shim, “ngin ïakhun shuwa da ka lynti kaba jaijai bad ban mih surok ban pynsngew ïa kaei ba ngi dawa, lehse lada ka sorkar kam patiaw ngim banse ban tied jingkhang biang sha ka kashari halor ka jingbym pyntrieikam ka sorkar ïa ka hukum ka jong ka Kashari,” ka la ong.
Kine ki nonghikai kiba ka kashari ka la bthah ban thungkam biang ki kynthup ïa ka Kong Phikirbha Khariah, Aibihlang Suchiang, u Thlamuana Darnei, ka Laljoy Darnei, ka Mary Jone Ngamlai, ka Lalchonpari Theite bad u Samiran Rishi.
