Shillong, K’Lyngkot 05 : Da ki hajar ngut ki paidbah ki la tuid sha ka jingïalang paidbah kaba nyngkong eh ba la pynlong da ka National People’s Party (NPP) Shella Block ha kane ka sngi Palei ha Umkhabaw, kawei na ki shnong ba don ha khappud bad ri Bangladesh.
Ha katei ka jingïalang kaba heh bha ban pynlong ha katei ka thaiñ la wan ban donlang ruh naduh u Myntri Rangbah ka Jylla, Conrad K Sangma ba dei ruh u National President ka NPP, nangta u Symbud Myntri Rangbah, Bah Prestone Tynsong ba dei ruh u National Vice President bad ruh ka Nongai ktien jong ka NPP Kong Ampareen Lyngdoh kaba dang shu dep resaiñ kum ka MLA jong ka Shillong East nalor kiwei kiwei ki nongïalam ka party.
Ka jingpynlong ïa katei ka jingïalang ka long ba ki paidbah kin ïoh sngewmarkhmat ïa ka jingpynshai na ki nongïalam ba hakhmat jong ka party haba ïadei bad ka jingpynkhreh na ka bynta ka elekshon MLA kaban sa long shen ha kine ki khyndiat bnai ban wan.
Na ka liang ka kyrtong jong ka NPP na katei ka constituency, Kong Grace Kharpuri haba kren ha ka jingïalang ka la ong ba jan baroh ki ju kylli beit ïa ka la ka khlaiñ neem sha ki shnong kiba don ha khappud bad dei na kata ka daw ka la pynlong noh ïa katei ka jingïalang kaba heh ha katei ka thaiñ kaba don pajih na ka shnong Shella.
“Nga kmen palat ba kine ki nongïalam jongngi naduh u Myntri Rangbah bad Symbud Myntri Rangbah ki wan ban khmih bad wan peit ïa phi. Nga kwah ruh ba phin ïohi kumno ka lynti ïaid nalor kaba jngai bad ba kumno ki paidbah kane ka thaiñ ki mad jingeh. Kumta nga kwah ba phin mih na kane ka jaka da ka jingkitkhlieh lang na bynta jong ki ruh ban wanrah noh ka jingkylla,” ka la ong.
Nalorkata, ka ong ruh ba lada baroh ki kwah ka jingkylla, ka jingtuid jong ki paidbah ha katei ka sngi da ki hajar hajar ngut kam dei shuh ban kylla tad haduh ban da dei ka por thep vote ban ïoh ïa ka jingjop.
Katei ka kyrtong ka la ong ruh ba kiwei ki party ynda haba ki ïohi ba ka jingpoi ki paidbah ka la jan kot phew hajar, kin sa pyrshang da kiwei pat ki lad ki lynti kumno ban ïalam bakla.
“Man ka sngi ka NPP ka kiew stet ha Shella bad nga shaniah skhem ruh ha ki nongkitkam bad ki paidbah ba kin skhem ka nongrim ba ngin ïoh ïa ka jingjop kaba donburom,” ka la bynrap biang. Ka la ong ruh ba ki paidbah kim dei ban kheinsting hynrei ban shim ba kane kadei ka kabu ksiar na bynta jong ki paidbah katei ka thaiñ bad ka constituency ban ïoh noh ïa ka jingkylla ha ka roi ka pa bad ha baroh ki liang.
“Kiwei ki party ki wan hynrei ynda la dep phi ïoh aiu, kumta rai bha mynta na ka bynta ka lawei jong phi,” ka la ong da kaba kyntu ruh ba ki paidbah katei ka thaiñ ba kim dei satia ban don ha ka jingtieng.
Nalor ka jingkren na u Myntri Rangbah, Symbud Myntri Rangbah la ïoh ruh ka jingkren na i Kong Ampareen, Kong Probity Nongpluh President NPP Women’s Wing bad ruh na u General Secretary ka NPP East Khasi Hills, Bah Aibor Tynsong.
