Nongpoh, Rymphang 18: Hadien ka jingïaid shaphrang jong ka lympung ïalehkai Badminton bala tip kum ka Open to All Badminton Tournament bala pynlong da ka Ri-Bhoi District Badminton Associa-tion, katei ka lympung kala poi noh sha kaba kut haka janmiet sngi Saitjaiñ hadien ka jingwan shim bynta shitrhem jong ki samla ïalehkai na kylleng ki jaka bad kumjuh ruh kiba la kham ïaw ka rta hadien ka jingïakhun phainal kaba la long ha State Sports Council, Indoor Stadium Umlyngkdait.
Ka jingïakhun phainal ha katei ka lympung ki kynthup ïaka Men’s Single hapdeng u Vicky Nongrang pyrshah ïa u Jobin Gamaliyel Thomas ha kaba u Vicky Nongrang u la lah ban pynliem noh ïa u Jobin Gamaliyel Thomas da 21-11 haka 1st set bad 21-17 haka 2nd set, ka jingïakhun haka Men’s Double kala long hapdeng u Syllok Marbañiang bad u Jackson Lyngdoh pyrshah ïa u Mewanpyntngen Shadap bad u Babitlang Ryndong ha kaba u Syllok Marbañiang bad u Jackson Lyngdoh kila lah ban pynliem noh ïa u Mewanpyntngen Shadap bad u Babitlang Ryndong da 21-16 haka 1st set, 17-21 haka 2nd set bad 21-13 haka 3rd set.
Ka jingïakhun jong ki Men’s Veteran (40+) kala long hapdeng u Aiborlang Ranee bad u Sidhart Das pyrshah ïa u Wadshem-phang Nongma-lieh bad u George F Blah ha kaba u Aiborlang Ranee bad u Sidhart Das kila lah ban pynliem ïa u Wadshem-phang Nongma-lieh bad u George F Blah da 21-8 haka 1st set bad 21-14 haka 2nd set.
Na ka liang ka RBBA kum ka jingpynshlur ïaki samla bala jop bad kumjuh ruh kiba rem haka jingïakhun phainal kala sam ruh da ki khusnam bad song pisa sha kiba jop bad kumjuh ruh kiba rem ryngkat ki syrnod sha baroh ki nongïashimbynta.
Ha katei ka jingpynhap pyrda noh ïa katei ka lympung la wan ruh ban sakhi da ka jingdonlang u bah Franky Nongrum President ka RBBA, Anand Swet Secretary, u samla Alberto Nongsiej President ka RBYF Nongpoh Circle bad kiwei kiwei ki riew rangbah.
