Long borabor ki khun kiba kohnguh sneng ïa ki kmie ki kpa bad ki nonghikai: Olansing Suiñ

Umsawrang, Rymphang 18: Ka Umsawrang Lower Primary School, Dangar, East Khasi Hills District da ka jing-i-phuh i-phieng ka la ïoh ban rakhe ïa ka jingdap 50 snem ne ka Golden Jubilee ha kaba u bah Olansing Suiñ, MLA ka Mawsynram Constituency u la long kum u Kongsan bad u bah H.M. Shangpliang, MLA ba rim kum u Symbud Kongsan.
Lah ban kdew ba ïa ka Umsawrang Lower Primary School la seng nyngkong eh ha ka 18 tarik u Rymphang, 1974 da u (L) S.P. Syiemlieh bad la buh nonghikai ïa ka kong Krinsiloda Marbaniang bad ka kyrteng jong ka skul la ai kyrteng Umsawrang Nursery School. Nangta, katba nang ïaid ki snem ha u 1980 ka shnong ka phom ïa ka Managing Committee jong ka Umsawrang Nursery School hynrei dei tat ha u snem 1981 kane ka juh ka M/C ka la kylla kyrteng noh ïa ka skul sha ka Umsawrang Lower Primary School tang hadien ba ka la phai noh sha ka East Khasi Hills District.
U bah Olansing Suiñ, MLA ka Mawsynram Constituency haba kren ha ka jingïalang u la pynpaw ka jingaikhublei ba kyrpang ïa baroh ki don ka bynta ha kane ka Umsawrang Lower Primary School ba kane ka skul ka la kynjoh mynta ïa ka jingdap 50 snem bad khamtam eh ïa ki nongpynïaid kiba la trei shitom naduh kaba sdang ba la seng ïa ka ban ai jinghikai ha ka liang ka jingnang jingstad bad u da ka jingkyrmen ruh ba lyngba ka jingtreishitom jong ki nonghikai kin sa pynmih shuh shuh ïa ki khynnah skul ki ban sa long kum kita ki khynnah bad ki nongshong shnong ki ban long ki nongkit nongbah lem ïa ka jingïaid lynti jong ka wat ban kynjoh ruh haduh 100 snem.
Ha kajuh ka por u la pynkynmaw ruh, “Ka jingkyntu kynpham jong ki kmie ki kpa naduh mynshwa ba kim shah ïa nga ba ngam nym leit skul, bad lada ai lad ïa ka mon jong nga ban rai ngam shym la ong kumba nga long mynta”, ong u bah Suiñ, namarkata, lyngba ka jingpynkohnguh ïa lade ha ka mon jong ki kmie ki kpa u sa long briew kumne kumba u long. U la ong shuh shuh ba ka jingbym lah bad ka jingbym shemphang kam dei ka daw jong ka jingduna hynrei ka dei tang ka jingjai tuh. Kumta u la kyntu ïa ki khynnah skul ba ki dei ban long kiba kohnguh sneng ïa ki kmie ki kpa bad kumjuh ruh ki nonghikai khnang ba ka lawei jong ki kan long kaba phyrnai.
U la kyntu ruh na ka bynta ki nonghikai bad ïa ki kmie ki kpa ba wat ong ba ki khynnah ne ki khun jong ki kim long kiba stad ne shemphang hynrei ka donkam eh ka jingïatreilang na baroh ar liang ban pynwan dur ïa ki khynnah ha ka jingnang jingstad, namar ki nonghikai ba nyngkong eh dei ki kmie ki kpa ha ki ïing ki sem bad ki kmie ki kpa ba ar jong ki khynnah skul dei ki nonghikai ha kaba ka por kaba khambun bad ki kynta jong ki khun ki don bad ki nonghikai.
U bah Olansing Suiñ u la pynkynmaw ruh ba ka skul ka hikai ymdei ba kin ïa wad ki kam sorkar hynrei ka hikai ba kumno kin long ki nongshong shnong ban tei ïa ka lawei ba bha na ka bynta ka la shai la shi sngi, bad kumno ban long ki nongïalam ha ki bynta bapher bapher jong ka imlang ka sahlang.
Ïa ka jingialang ha kane ka sngi la pynïaid da u bah Tiwell Nongsiej, ka jingkren pdiang sngewbha da u bah Phorless Syiemïong, Secretary Managing Committee, ka jingpyllait ïa ka Souvenir da u bah H.M. Shangpliang, MLA ba rim kum u Symbud Kongsan, ka jingkren lyngkot na u bah J. Marbaniang, nonghikai ba la shongthait bad jingkren khublei na ka kong P. Khardewsaw, Assistant Teacher jong ka Umsawrang Lower Primary School.