Pynkut ka Shillong Lajong FC ïa ka Indian Football League 2025-26 ha ka kyrdan ba ar
Jop da 3 kol ïa ka Diamond Harbour FC ha ka jingïalehkai ba khatduh.
Shillong, Jymmang 24: Ka Shillong Lajong FC ka la pyndep ha ka kyrdan ba ar ha ka lympung Indian Football League 2025-26, ka samoi kaba bha tam jong ka kynhun ha kane ka lympung (kaba la tip mynshwa da ka I-League).
Ym tang ba ka la pyndep ha ka kyrdan ba ar hynrei ka Lajong ka la pynliem ruh da 3-0 kol ïa ka Diamond Harbour FC ha ka jingïalehkai ba khatduh ha Kalyani, West Bengal. Kane kadei ruh ka jingjop kaba 8 ïa ka Lajong ha kane ka samoi.
Hynrei hadien ka jingïalehkai dei ka DHFC kaba la ïoh ban lehkmen namar ba ka ladep ban pynthikna ïa ka nam lahduh da kaba ïakhaid bad ka Dempo SC katto katne sngi mynshwa. Kumta ka Diamond Harbour kan kiew kyrdan sha ka Indian Super League jong ka samoi ban wan.
Haba phai sha ka jingïalehkai ba khatduh, ka Lajong ka la lamkhmat lypa da 2 kol tang ha ka kylla step da kaba pynkhihjar lyngba u Everbrightson Mylliempdah (30′) bad u Gladdy Kharbuli (45’+2), nangta u Phrangki Buam (54′) u la thep ïa ka kol kaba khatduh ha ka kylla miet.
U Phrangki Buam u la pyndep ïa ka samoi 2025-26 kum u nongïalehkai India ba bun kol tam, da kaba thep 8 tylli ki kol, kaba duna tang shi kol ïa u Top Scorer ka IFL, u Marcus Joseph, uba la thep 9 kol.
Ka Lajong ka la pyndep ha ka kyrdan kaba ar da kaba jop 8 sien, rem 2 sien bad ïakhaid 4 sien ban kamai 28 point naki 14 tylli ki jingïalehkai. Nangta ka la thep baroh 28 tylli ki kol, bad shah thep duna tam na baroh da tang 12 kol haki liang pyrshah, bad ka pyndep ïa ka samoi ryngkat ka jingïapher kol kaba heh da +16.