Paw kyrteng ar ngut na Meghalaya ha ka kynhun India na ka bynta ka SAFF Women’s C’ship 2026
Pyrshah ïa ka Maldives yn aireng ki thei India mynta ka sngi.
Shillong, Jymmang 24: U head coach jong ka kynhun ïalehkai phutbol ki kynthei ka ri India, u Crispin Chettri, ha ka sngi Saitjaiñ, 23 tarik Jymmang, 2026, u la pynbna ïa ka kynhun ba pura ban shim bynta ha ka SAFF Women’s Championship 2026 ka ban long ha Margao, Goa, naduh kane ka sngi nyngkong (25 tarik Jymmang) haduh ka 06 tarik Jylliew.
Lah ban kdew ruh ba ha ka sien ba nyngkong eh, ar ngut ki thei ïalehkai ka jylla Meghalaya, ka Ribansi Jamu bad ka Sanfida Nongrum ki la shah kynthup lang ha kane ka kynhun kaba don 23 ngut ki nongïalehkai.
ïa ka kynhun ba nyngkong kaba don 26 ngut la pynbna ha ka sngi Ba-ar jong ka taïew ba ladep. Na katei ka thup, la weng noh lai ngut ki nongïalehkai, kynthup ïa ka Shubhangi Singh, ka Priyadharshini Selladurai bad ka Rimpa Haldar.
Ka India, ka la shah pynïakap ha ka Group B, bad kan sdang ïa ka jingïalehkai ba nyngkong pyrshah ïa ka Maldives mynta ka sngi Nyngkong, ka 25 tarik Jymmang ha ka por 7:30 baje janmiet, shuwa ba kan aireng ïa ka Bangladesh ha ka 31 tarik Jymmang.
Katba ka Group A ka kynthup ïa ka Nepal, Sri Lanka bad ka Bhutan. Ki ar tylli ki kynhun kiba pyndep ha khmat duh na kawei pa kawei ka Group kin rung sha ka semi-final, ka ban sa long ha ka 03 tarik Jylliew. Ka phainal kan long ha ka 06 tarik Jylliew. Baroh ki jingïalehkai kin long ha Pandit Jawaharlal Nehru Stadium.
Ka thup kyrteng ki 23 ngut jong ka kynhun India na ka bynta ka SAFF Women’s Championship 2026:
Goalkeeper: Panthoi Chanu Elangbam, Ribansi Jamu, Shreya Hooda
Defender: Astam Oraon, Juli Kishan, Nirmala Devi Phanjoubam, Purnima Kumari, Ranjana Chanu Sorokhaibam, Sarita Yumnam, Thoibisana Chanu Toijam
Midfielder: Aveka Singh, Jasoda Munda, Priyangka Devi Naorem, Sanfida Nongrum, Sangita Basfore, Shilky Devi Hemam
Forward: Grace Dangmei, Karishma Shirvoikar, Lynda Kom Serto, Malavika P, Manisha Kalyan, Pyari Xaxa, Soumya Guguloth
Head coach: Crispin Chettri
Assistant coach: Sujata Kar and Nivetha Ramadoss
Goalkeeping coach: Mario Aguiar
Strength & conditioning coach: Amit Yadav