Jowai, Risaw 02: Ka ophis treikam jong u District Medical & Health Officer, West Jaiñtia Hills District, lyngba ka AYUSH Department ka la ïoh ban pynkut noh ïa ka jingleit pynsngewthuh kaba shibnai lynter ïa ka prokram Rashtriya Poshan Maah (National Nutrition Month) halor ka phang pdeng kaba ong “POHSHAN BHI PADHAI BHI (NUTRITION WITH EDUCATION) ha kane ka 30 tarik mynta u bnai ha ka skul Khim-U-Sniang Govt. L.P School, Jowai, West Jaiñtia Hills District.
Haba pynkut ïa kane ka jingrakhe ka tnat AYUSH kala wan ban pynlong ïa ka jingïalang bad ka jingai jinghikai ban pynsngewthuh sha ki khynnah skul jong ka Khim-U-Sniang Govt. L.P. School, Jowai. Ha kane ka sngi la wan ban ai jinghikai da ka Dr. (Mrs) B.T. Hinge, ha ka jingïadon ryngkat ki nongtrei na katei ka tnad treikam.
Ka Dr. Hinge haba ai jingbatai sha ki khynnah skul, kala ïathuh ïa ka jingdonkam ban tip kumno ban bam ïa ki jingbam kiba tei met kum ki khynnah skul. “Haoid ki don shibun ki jait jingbam ki bym tei met hynrei ki long kiba bang bad kiba khring ïa ki khynnah bad wat ïa ki rangbah ruh, hynrei kum ïa kine dei ban bam tang teng teng khnang ba kan ym ktah ïa ka koit ka khiah jong phi” la ong ka Dr. Hinge.
Na ka liang ka Dr kala pyni shibun ki nuksa bad ki jait jingbam kiba pynïoh bor ïa ki khynnah, kum ki soh, ka kait bad ki jhur ba bun jait. Ka Doctor kala pynsngewthuh halor ka jingdonkam ban thung ïa ki jait jhur bad jait soh kiba pher bapher ha ki kper skul, khnang ba ki khynnah kin ïoh ban bam na kine ki jingthung bala thung ha ki kper khlem da pyndonkam ïa ki sboh dawai (Chemical) bad kin long ki jingbam kiba pynmyntoi ïa ki kum ki khynnah skul.
Ha kane ka sngi la sam ruh ïa ki jingbam ba kynthup ïa ki soh sha baroh ki khynnah pule jong kane ka skul. Kham hashwa jong ka jingïalang la ïoh ïa ka jingkren pdiang na ka liang jong ka skul ba la ai jingkren da u Babu D.S. Dhar, uba la pdiang sngewbha ïa ka kynhun jong ki Doctor bad ïa ka ophis u DM&HO kaba la kloi ban wan pynlong ïa kane ka prokram ha ka skul jong ki.
Kum ban shu pynkynmaw ïa kane ka prokram Rashtriya Poshan Maah kaba dei ka prokram jong ka sorkar kmie (Central Government) la pynlong baroh shi bnai lynter ha baroh ki bynta jong ka ri India bad na ka liang ka tnad ka Koit ka khia jong ka West Jaiñtia Hills District (DM&HO) lyngba ka AYUSH kila pynlong ïa ki prokram sha ki shnong bad ki skul bapher bapher bapher jong ka West Jaiñtia Hills, kynthup ïa ki skul bad ki College ha nongbah Jowai, tad haduh ka 30 tarik u Nailur.
