Nongpoh, Lber 23: Ka skul bah Mahatma Gandhi University kaba don ha 13 mer Byrnihat mynta ka sngi kala ioh ban pyndon burom ïa kumba 493 ngut ki samla haka 3rd Convocation kiba la pyndep ïaki jingpule bapher bapher ba kynthup 154 ngut kiba pyndep ïaka Post Graduate, 261 ngut kiba la pyndep ïaka Graduate bad 78 ngut kiba la pyndep ïaka kyrdan PhD bala pynlong ha auditorium hall jong katei ka skulbah.
Ha katei ka jingleh burom jong ka skul bah ïaki samla pule la wan ruh ban sakhi da ka jingdonlang u Ilias Ali Padmashree Awardee kum u kongsan, Dr. KK Sarma symbud kongsan, Dr. Rajan Chopra Chancellor, Dr. Debrata Das Vice Chancellor bad kiwei kiwei ki khraw pyrkhat bad ki nongshah khot sngewbha na kiwei kiwei ki skulbah.
Naka liang u Ilias Ali kum u kongsan haba kren ha katei ka sngi u la pynpaw ka jingsngewkmen ban don bynta bad katei ka sngi lehkmen jong ki samla pule kiba la pyndep ïaki jingpule bapher bapher jong ki na katei ka skulbah wat hapdeng shibun ki jingeh haka jingïaid lynti jong ki bad katei ka long kum ka jingai mynsiem haka jingim jong ki ba hadien ba ki mih na katei ka jaka bad leit ban trei ne bteng ïaka jingpule kyrmen ba kin ai kaba bha tam naka bynta ka jylla bad ka ri hi baroh kawei.
U la ong ruh ba ki samla ki long ka lawei jong ka ri, lada ki samla ki kiew haka jingpule ka ri ruh ka kiew sted ha baroh ki liang namar ka jingnang jingstad hi ha kane ka juk kaba mynta ka long kaba kongsan bad ka atiar kaba khlaiñ da kaba ai mynsiem ruh ïaki samla pule ba kin long ka nuksa bad ka jingshai ïaka jylla kaba ki leit phai bad ka ri hi baroh kawei.
