Donkam ban don jingkitkhlieh ban pynneh pynsah ïa ki tyllong um, kyntu ki heh sorkar na EJHD

By Mawphor News Desk On Mar 24, 2024

Khliehriat Lber 23: Ka tnat Public Health Deaprtment East Jaiñtia Hills District, hynnin ka sngi saitjaiñ ka la rakhe ïa ka sngi kyrpang jong ka um ba la tip kum ka World Water Day, ha kaba ka Additional Deputy Commissioner (ADC), ka kong J.Kharpuri, MCS ka la long kum ka kongsan ha katei ka sngi.
Ha katei ka sngi ki la don ruh ka jingpyni nongmuna na ki khynnah skul jong ka skul Cambridge Secondary School Ladrymbai, ka Oxford Secondary School, Ladrymbai, Little Star Secondary School Ladrymbai, Hill’s Field English School Wapungskur bad ka Tiachaphrang Higher Secondary School Sohkymphor, ki la pyni bad ai ki jingbatai halor kumno ban pynneh pynsah bad ruh ban pynkhuid ïa ki tyllong umbam, um dih.
Haba kren kum ka kongsan, i kong J.Kharpuri i la kyntu ïa ki paidbah ba ki dei ban long ki nongshong shnong kiba don ka jingkitkhlieh ban pynneh pynsah ïa ki tyllong umbam umdih bad ruh ban sumar khuid ïa ki tyllong um kiba don ha shnong ha thaw, la ong ruh ba ka thma kaba lai kan sdang nyngkong na ka um, namar ki wah kin sa kylla sniew ha kaba kin nym long shuh ban dih ban bam, ha ka jingbishar bniah na ka tnat ka koit ka khiah ruh la lap ba don bun ki khynnah khyllung kiba ioh pang bad ong ba dei na ka um, la kyntu ïa ki bor shnong ruh ba kin shim khia bha ïa kane ban pynneh pynsah ïa ki tyllong um ban sumar khuid ïa ki um ki wah kiba don ha shnong ha thaw da kaba iatreilang bad ki tnat bapher bapher “ka la dei ka lyngkor ba baroh ki paidbah kin shim lang ban pynbha ïa ki tyllong um, ban iada ïa ki khlaw ki btap, ki lum ki wah kiba u Blei u la ai kyrpang, lym kumta ki pateng ban wan ki tim ïa ngi lada ngi pom pathar ïa ki dieng ki siej bad pynduh pyndam ïa ki khlaw ki btap, ngi la don lypa ha ki jaka ba khappud bad kiwei pat ki jylla bad kumjuh ruh bad kiwei pat ki ri, te lada kan wan kane ka thma um kin sa wan ban hiar thma shane sha ngi tang na ka daw ka um” la bynrap i kong Kharpuri.
Ka kongsan ka la ong ruh ba ka jingtih marpoh khyndew kam dei kaba sniew hynrei donkam pat ban pyrkhat ne leh da sumar bha ban buh ki lad jingiada ban nym ktah ïa ki tyllong um kiba don hajan bad ong ruh ba ki don ki wah kiba la khie im biang mynta namar la sangeh ban tih ïa ki mar pohkhyndew bad ki la don ki doh um ha ki um ki wah,
U Executive Engineer jong ka tnat PHE (Electrical Division Jowai, u bah P.Synnah u la ong ba man la u snem ka tnat ka ju siew haduh 2 klur 50 lak tyngka tang ka Bill bai pom um ha Jowai bad ong ba ka um ka long kaba rem dor bha, u la kyntu ïa ki paidbah ba ki dei ban shim khia ban sumar bha ïa tyllong um “Haba leitkai sngewbha shano shano bad kumjuh ruh ki nongjngohkai pyrthei ruh bunisen ki kwah ban leit sha ki jaka ba don ki um ki wah kiba bha na kata ka daw donkam ban sumar ïa ki um ki wah ym dei ban pynjakhlia ne bret jakhlia pathar ha ki um ki wah bad ruh donkam ban sumar bha ban ioh ruh ban aiti pateng da kaba bha sha ki pateng ki ban wan”,.
Haba kren halor ki kyntien phira “ka um na ka bynta ka jingsuk” utei u heh jong ka tnat PHE u la ong ba donkam ban pyrkhat bha ïa kine ki kyntien phira namar bunsien ki mih ki jingiamai iania tang na ka daw ka um bad dei naduh u snem 1993 la sdang noh ban rakhe ïa kane ka World Water Day.
Kumjuh ruh u SDO jong ka tnat PHE (Electrical Sub-Division Jowai), u bah R.Nongtdu u la ong ba U Blei u la thaw ïa ka um ha ka pyrthei bad ka don 70 percent ka um ha kane ka pyrthei, u buh ïa ki khlaw ki btap, ki mrad ha ka mariang bad khatduh u buh ia u/ka briew ba kynsai na baroh ki jingthaw jong u ban ioh ban ri ban sumar ïa ka mariang sawdong kynthup ki um ki wah, lada ngim nang ban sumar kan sa poi ka por ban jynjar, u kyntu ïa ki paidbah ba ki dei ban don ka jingkitkhlieh lang ban sumar bha bad pynneh pynsah ïa ki um ki wah “Na ka liang ka tnat ruh ngi wad ki lad ki lynti ban pynneh pynsah ïa ki um ki wah, ngi trei ha PHE ngim don jingeh ban pynpoi ïa ki pipe um ha ki shnong ki thaw hynrei ka jingeh ba ngi kynduh dei ka jingjngai palat ki tyllong um, namar bun ki tyllong um ki la sniew ym long shuh ban dih, kiba stad ki la ong ba kan sa poi ka por ba ka um kan kham rem dor ban ïa ka petrol na kata ka daw ha shwa ban jia kata la pynlong ïa kane ka World Water Day khnang ban ioh ban pynsngewthuh ïa ki paidbah ba ka um ka long kaba donkam tam namar khlem ka um ym lah ban im, don ki jaka kiba ki briew ki ieng da u laiñ ban ioh pdiang um ban ioh ïa ka um ban dih”
U la ong ruh ba ka jingthmu jong kane ka prokram ka long ban pynsngew sha ki paidbah ïa ka jingkordor ka um, dei ha u snem 1993 ha shnong Brazil la rai da ka UN ban buh ïa kane ka 22 tarik u bnai lber man la u snem kum ka sngi kyrpang, ka World Water Day”
Ha katei ka prokram la ioh ruh ka jingkren ha u SDO-PHE RWS Sub-Division Khliehriat, u bah M.Pasah, na ki Scientist jong ka Trinity International bad la pynbyrngia ïa ka prokram da ki jingshad tynrai na ki khynnah skul bad ïa ka prokram la pyniaid da i kong T.Dkhar iba dei i Coordinator For IEC , DPMU-JJM.