Pynkup burom ka skulbah Assam Don Bosco University haduh 1286 ngut ki samla pule ha ka XII Convocation
Nongpoh, Nailur, 24: Ka skulbah Assam Don Bosco University kawei naki skulbah ba paw haka jylla Assam kala ïoh ban pynkup burom haduh 1286 ngut ki samla pule haki tnad pule bapher haka Convocation ba khatar (XIIth Convocation) ha ka 23 tarik Nailur, 2023 ha Tapesia Campus kaba don ha Sonapur, Guwahati.
Ha kane ka sngi u Lat jong ka jylla Assam, U Gulab Chand Kataria, u la wan ban shimbynta kum u khongsan haka jingdonlang u Vice Chancellor, Fr. (Dr) Jose Palley bad Pro Vice Chancellor, Fr Joseph Nellnatt, ki ophisar naka tnad pule puthi, ki nonghikai ki samla pule lem bad ki riew pawkhmat na kylleng ka Ri India.
Napdeng kitei ki 1286 ngut ki samla pule na kylleng ki jaka kiba la shah pynkup burom ha katei ka sngi, 555 ngut ki la ïoh pdiang ïa ka bachelor’s degree ha ka tnat pule Engineering, Basic Sciences, Commerce, Mana-gement, bad Huma-nities, 731 ngut ki la ïoh pdiang ïa ka Master’s Degree ha ki tnat pule bapher bapher jong ka Engineering, Science, Commerce, bad Manage-ment. La pynkup burom ruh ïa 23 ngut ki samla pule kiba ïoh pdiang ïa ka Doctoral Degree lem bad 134 ngut ki samla pule na ka Distance Education jong kane ka skulbah.
Ki samla ki ba ïoh ïa ka takma Ksiar (Gold Medal) ki don 36 ngut. Kine ki samla pule ki dei kiba wan shakhmat (highest CGPA) ha ki tnat pule jong ki. Shuh shuh la ai ruh ïa ar tylli ki takma, Chancellor’s Medal bad Vice Chancellor’s Medal ïaki ar ngut ki samla pule kiba long ki lahduh tam ha ki jingpule jong ki ha ka Master and Bachelor’s degree.
Ha une u snem la sam ruh ïa ka takma ‘FATHER MAVELY GOLD MEDAL’ bad ‘SHRI JN BAWRI MEMORIAL GOLD MEDAL’ ïa ki samla pule kiba lahduh ym tang ha ka jingpule jong ki hynrei kiba synrap-lem ha ka imlang ka sahlang (social commitment).
Naka liang u lat ka jylla Assam u Gulab Chand Kataria u la ai ka jingkhublei ba kyrpang sha baroh ki samla pule kiba la pyndep haki tnad pule bapher bapher jong katei ka skulbah bad ka jingpyndep jong ki ïaka jingpule na katei ka skulbah kan long ka nuksa, ka jingkyrmen bad ka lawei jong ka ri India bad khamtam ïaki samla pule kiba dang don hapdeng ka jingpule bapher bapher ba kim dei ban pynlut kai ïaka por hynrei ban minot thop ban poi sha ka thong kaba ki angnud.